Беларуская гімнастка Бабкевіч стала чэмпіёнкай Еўропы сярод юніёрак
Кіра Бабкевіч. Фота Беларускай асацыяцыі гімнастыкі 28 мая, Мінск . Беларуска Кіра Бабкевіч прынесла беларускай камандзе першы медаль на чэмпіянаце Еўропы па мастацкай гімнастыцы, які праходзіць у балгарскай Варне,
Наша спартсменка заваявала золата ў практыкаванні з мячом сярод юніёрак. У кваліфікацыі ў гэтым відзе праграмы Бабкевіч заняла першае месца сярод 40 дзяўчат, а ў фінале таксама паказала лепшы рэзультат — 25,900 бала. Адну дзясятую беларусцы ўступіла немка Меліса Дзітэ, тройку з адставаннем 0,2 ачка замкнула ўкраінка Варвара Чубарава.
Год таму Кіра была чацвёртай у практыкаванні з мячом на юніёрскім чэмпіянаце свету. Таксама сёння наша гімнастка прыняла ўдзел у фінале з булавамі, дзе спынілася за крок ад подыума, да бронзы не хапіла 0,150 бала. Напярэдадні Бабкевіч разам з Маргарытай Журовіч і Ксеніяй Бандарэнка сталі шостымі ў камандным першынстве.
29 мая ў Варне вызначацца ўсе фіналісткі ў мнагабор’і і асобных відах у сеніёрак, на дыван выйдуць нашы Аліна Гарнасько, Дар’я Вярэніч і Ніколь Лявута. Медалі кантынентальнага форуму ў асабістым заліку і групавых практыкаваннях будуць разыграны 30 і 31 мая.
Турнір у Балгарыі — першы за чатыры гады вялікі старт, на якім нашы грацыі выступаюць з нацыянальнай сімволікай. Папярэдні чэмпіянат Еўропы па мастацкай гімнастыцы з беларускім удзелам праходзіў у 2021 годзе таксама ў Варне, тады нашы спартсменкі заваявалі шэсць узнагарод (дзве сярэбраныя і чатыры бронзавыя).
