Беларусь і Узбекістан за дзесяць гадоў павялічылі гандаль таварамі ў 13 разоў, паслугамі — у 30 разоў
17 чэрвеня, Мінск . Беларусь і Узбекістан за 10 гадоў павялічылі гандаль таварамі ў 13 разоў, паслугамі — у 30 разоў. Аб гэтым прэм’ер-міністр Беларусі Аляксандр Турчын заявіў на пленарным пасяджэнні V Міжнароднага інвестыцыйнага форуму «Устойлівасць інвестыцый: новыя гарызонты, новыя партнёрствы» ў Ташкенце,
«Ташкент стаў ключавым цэнтрам прыцягнення капіталу і дзелавой актыўнасці ў Цэнтральнай Азіі. Тэма нашага пленарнага пасяджэння — інвестыцыйная ўстойлівасць. Ва ўмовах глабальнай турбулентнасці гэта паняцце набывае выключна практычнае значэнне. Сапраўдная ўстойлівасць сёння вымяраецца не абстрактнымі фінансавымі паказчыкамі, а стабільнасцю работы рэальнага сектара. Гэта здольнасць дзяржаў і бізнесу ствараць абароненыя ад знешніх шокаў доўгатэрміновыя вытворчыя і лагістычныя ланцужкі. І галоўны інструмент тут — глыбокая міждзяржаўная кааперацыя. Для Беларусі Узбекістан — стратэгічны, абсалютна зразумелы і надзейны партнёр», — сказаў Аляксандр Турчын. 
Узаемны гандаль таварамі паміж Беларуссю і Узбекістанам прадаўжае ўпэўнена расці. За папярэднія 10 гадоў аб’ём узаемнага гандлю таварамі вырас больш як у 13 разоў. Вынікі 2025 года і першага квартала 2026-га пацвярджаюць зададзены тэмп. Такія ж трэнды і па паслугах: за апошняе дзесяцігоддзе рост больш як у 30 разоў. Узбекістан займае трэцяе месца па аб’ёме ўзаемнага гандлю паслугамі з Беларуссю сярод краін СНД.
Прэзідэнтамі Беларусі і Узбекістана пастаўлена цалкам дасягальная задача — выйсці на $2 млрд узаемнага тавараабароту на працягу некалькіх гадоў, звярнуў увагу прэм’ер-міністр. «Каб утрымаць гэту планку ў доўгатэрміновай перспектыве, патрэбны якасны пераход да ўзаемных інвестыцый у рэальныя актывы. Лічу, што ў гэтым напрамку ёсць нядрэнны задзел. Так, па аб’ёме назапашаных беларускіх інвестыцый Узбекістан займае другое месца сярод краін СНД. Перакананы, што сённяшняе мерапрыемства надасць імпульс умацаванню інвестыцыйнага супрацоўніцтва», — адзначыў кіраўнік беларускага ўрада. 
Міжнародны інвестыцыйны форум праходзіць 16-18 чэрвеня ў Ташкенце. Ён аб’яднаў прадстаўнікоў сусветнага бізнесу, суверэнных фондаў, банкаў развіцця і ўрадаў з больш як 95 краін. Гэта буйнейшая ў рэгіёне міжнародная пляцоўка для абмеркавання стратэгій павышэння ролі Цэнтральнай Азіі на міжнародным інвестыцыйным рынку. Форум быў упершыню праведзены ў сакавіку 2022 года. У мерапрыемстве прынялі ўдзел больш за 2 тыс. інвестараў і гасцей з 56 краін свету. У 2025 годзе форум сабраў ужо больш як 8 тыс. удзельнікаў, у тым ліку каля 3 тыс. замежных гасцей з 97 краін і 450 высокапастаўленых дэлегатаў.
