«Задзейнічаем усе свае магчымасці». Кушнарэнка аб падрыхтоўцы да Форуму рэгіёнаў Беларусі і Расіі
Фота з архіва 17 чэрвеня, Мінск . Аб ходзе падрыхтоўкі Мінскай вобласці да XIII Форуму рэгіёнаў Беларусі і Расіі, які пройдзе 25-26 чэрвеня, па выніках даклада кіраўніку дзяржавы журналістам расказаў старшыня Мінскага аблвыканкама Аляксей Кушнарэнка,
«Кіраўнік дзяржавы трымае тэму падрыхтоўкі да XIII Форуму рэгіёнаў Беларусі і Расіі на асабістым кантролі. Мінская вобласць да правядзення гэтай значнай падзеі гатова. Мы для сябе паставілі мэту гэтымі днямі прадэманстраваць унікальныя магчымасці рэгіёна ў культуры, адукацыі, ахове здароўя, а таксама ў эканоміцы. Апошняя — асноўная тэма форуму, а таксама фундамент выбудоўвання ўзаемаадносін з Расійскай Федэрацыяй. Таму мы задзейнічаем усе свае магчымасці, перадавыя пляцоўкі Смалявіцкага, Мінскага, Барысаўскага, Нясвіжскага, Дзяржынскага раёнаў, Жодзіна, для таго каб дастойна сустрэць удзельнікаў і гасцей гэтай важнай падзеі», — падкрэсліў Аляксей Кушнарэнка.
Старшыня Мінаблвыканкама адзначыў, што падрыхтоўка праходзіць у цесным узаемадзеянні з Саветам Рэспублікі, улічваецца вопыт правядзення папярэдніх форумаў. «Упэўнены, што гэта мерапрыемства стане чарговым крокам у развіцці як нашых краін асобна, так і саюзнай дзяржавы ў цэлым», — рэзюмаваў кіраўнік рэгіёна. 
