Беларусь і Кітай актыўна пераходзяць ад кропкавых культурных абменаў да сістэмнай работы — Снапкоў
Фота з архіва 1 ліпеня, Мінск . Культурна-гуманітарнае ўзаемадзеянне — гэта мяккая сіла, якая стварае фундамент даверу, адзначыў першы намеснік прэм’ер-міністра Мікалай Снапкоў, выступаючы ў горадзе Ланьчжоу правінцыі Ганьсу на цырымоніі адкрыцця першага Беларуска-кітайскага форуму рэгіёнаў,
«Устойлівае эканамічнае партнёрства немагчыма без глыбокага культурнага і чалавечага перапляцення. Наша стратэгія заключаецца ў фарміраванні не проста гандлёвых патокаў, а агульных сэнсаў, — падкрэсліў Мікалай Снапкоў. — Беларусь і Кітай маюць унікальную сумяшчальнасць каштоўнасцей: павага да традыцый, інстытутаў сям’і, імкненне да стваральнай працы і прыярытэт стабільнасці».
Краіны актыўна пераходзяць ад кропкавых культурных абменаў да сістэмнай працы. Гэта сумесныя адукацыйныя праграмы, турыстычныя і лячэбна-аздараўленчыя праекты.
«Асаблівы акцэнт на прамых кантактах паміж людзьмі, паколькі Беларусь — гэта бяспечная, гасцінная краіна з багатай гісторыяй і выдатнай экалагічнай абстаноўкай. Наш прыярытэт — выхаваць пакаленне спецыялістаў і грамадзян, для якіх беларуска-кітайская дружба з’яўляецца не абстрактным паняццем, а асабістай жыццёвай пазіцыяй», — адзначыў першы намеснік прэм’ер-міністра.
«Мы добра ведаем і памятаем, што правінцыя Ганьсу — гэта калыска Шаўковага шляху, легендарны калідор Хэсі (Ганьсуйскі калідор), па якім тысячагоддзямі ішлі караваны. Але сёння нашы караваны — гэта чыгуначныя саставы Беларусь — Кітай, гэта тэхналогіі, гэта інфармацыйныя патокі», — адзначыў Мікалай Снапкоў.
«Мы фізічна і ментальна адраджаем Вялікі шаўковы шлях, але на новым тэхналагічным вітку», — заўважыў Мікалай Снапкоў.
Ён лічыць, што сам час патрабуе пераходу ў супрацоўніцтве паміж Беларуссю і Кітаем ад мадэлі «цэнтр — цэнтр» да мадэлі «рэгіён — рэгіён».
«І тое, што гэты механізм запускаецца менавіта тут, у Ланьчжоу, а не ў Пекіне або Мінску, гэта глыбока сімвалічна. Гэта знак даверу і сталасці нашых адносін», — падкрэсліў першы віцэ-прэм’ер. — Як сказаў вялікі кітайскі філосаф Лаа-цзы: «Дарога ў тысячу лі пачынаецца з першага кроку». Сёння мы робім гэты крок разам. Мая мара — каб праз некалькі гадоў, азіраючыся назад, мы сказалі: «Так, тая самая новая эканамічная рэальнасць пачалася менавіта ў Ланьчжоу».
Мікалай Снапкоў пажадаў усім удзельнікам форуму прадметнай размовы, узаемавыгадных дагавораў і кантрактаў, вялікай чалавечай дружбы. «Беларусь адкрыта для вас сэрцам і эканомікай», — рэзюмаваў першы намеснік прэм’ер-міністра Рэспублікі Беларусь.
Арганізатарамі гэтага маштабнага мерапрыемства выступаюць Міністэрства замежных спраў Беларусі і Гродзенскі аблвыканкам, Кітайскае народнае таварыства дружбы з замежжам і Народны ўрад правінцыі Ганьсу.
Тэма форуму — «Аб’яднанне сіл рэгіёнаў у імя сумеснага развіцця і працвітання». Напярэдадні, 30 чэрвеня, пачалі ўжо праходзіць бізнес-сустрэчы і мерапрыемствы. Форум сабраў больш за 270 удзельнікаў з 23 рэгіёнаў КНР і прадстаўнікоў усіх абласцей Беларусі і горада Мінска.
На палях форуму плануецца падпісанне амаль 40 двухбаковых дакументаў у сферы інвестыцый, гандлю, міжрэгіянальнага, навукова-тэхнічнага супрацоўніцтва і гуманітарнага супрацоўніцтва.
