«У нашай прафесіі абыякавасць знішчае». Жук пра галоўныя якасці сучаснага журналіста
Дзмітрый Жук. Фота факультэта журналістыкі БДУ 31 жніўня, Мінск . Міністр інфармацыі Беларусі Дзмітрый Жук прыняў удзел у пасяджэнні Савета факультэта журналістыкі БДУ, дзе абмеркавалі падрыхтоўку сучасных медыяспецыялістаў, узмацненне практычнага складніка навучання і ўзаемадзеянне факультэта з рэдакцыямі СМІ,
Напярэдадні новага навучальнага года ўдзельнікі пасяджэння абмеркавалі, якім павінен быць выпускнік журфака сёння і якія кампетэнцыі неабходны маладому спецыялісту для паспяховай работы ў медыясферы. Ключавым пытаннем стала фарміраванне не толькі прафесійных навыкаў, але і асабістай адказнасці будучых журналістаў. «Выпускаць прыстойных і патрыятычна настроеных юнакоў і дзяўчат — гэта самы галоўны вынік нашай работы», — падкрэсліў міністр.
Асаблівую ўвагу на пасяджэнні ўдзялілі ўменню журналіста працаваць з людзьмі. Ва ўмовах імклівага развіцця лічбавых платформ і сацыяльных сетак, адзначылі ўдзельнікі, прафесійная дзейнасць не павінна абмяжоўвацца віртуальнымі стасункамі. «Журналістыка — публічная прафесія. Нельга жыць толькі ў сваёй Instagram-стужцы», — сказаў Дзмітрый Жук.
Ён таксама гаварыў аб праблеме, з якой сёння сутыкаюцца маладыя спецыялісты. «Маладыя журналісты не заўсёды гатовы размаўляць вочы ў вочы. Выпускніку бывае складана зняць трубку і пагаварыць з людзьмі», — адзначыў Дзмітрый Жук.
Яшчэ адной важнай якасцю журналіста міністр назваў неабыякавасць да таго, што адбываецца ў краіне і грамадстве. «У нашай прафесіі абыякавасць знішчае», — падкрэсліў ён. 
Удзельнікі пасяджэння таксама гаварылі пра неабходнасць глыбокага разумення грамадскіх працэсаў. Сучасны журналіст павінен не толькі валодаць інструментамі стварэння кантэнту, але і ведаць, чым жыве краіна, разумець працэсы, якія ў ёй адбываюцца, і адказна ставіцца да кожнага апублікаванага слова. «Журналіст павінен ведаць, як жыве краіна, чым жыве краіна і хто прымае рашэнні», — прагучала ў час абмеркавання.
Асобны блок быў прысвечаны арганізацыі вытворчай практыкі студэнтаў, размеркаванню выпускнікоў і ўзаемадзеянню факультэта з рэдакцыямі сродкаў масавай інфармацыі. Удзельнікі абмеркавалі, як максімальна наблізіць адукацыйны працэс да рэальных умоў работы ў медыя, каб маладыя спецыялісты прыходзілі ў рэдакцыі не толькі з тэарэтычнымі ведамі, але і з практычнымі навыкамі. Гаворачы пра значэнне журналісцкай адукацыі, Дзмітрый Жук падкрэсліў маштаб адказнасці, якая ляжыць на выкладчыках і будучых спецыялістах медыя. «Мы рыхтуем людзей, ад якіх залежыць, у якой краіне мы будзем жыць праз 20 гадоў», — адзначыў міністр. 
У пасяджэнні прынялі ўдзел прарэктар па вучэбнай рабоце і адукацыйных інавацыях БДУ Алеся Прахарэнка, дырэктар — галоўны рэдактар выдавецкага дома «Беларусь сегодня» Вольга Ануфрыева, дэкан факультэта журналістыкі БДУ Лізавета Хмель, загадчыкі кафедраў, выкладчыкі і супрацоўнікі факультэта. Па выніках пасяджэння ўдзельнікі вызначылі ключавыя задачы і прыярытэтныя напрамкі развіцця факультэта на будучы навучальны год. Асноўны акцэнт зроблены на ўзмацненні практычнай падрыхтоўкі студэнтаў, пашырэнні ўзаемадзеяння з медыясферай і фарміраванні ў будучых журналістаў прафесійнай адказнасці, неабыякавасці і навыкаў работы з людзьмі.
