У Брэсце сабраліся сябры Беларусі, якія падзяляюць беражлівае стаўленне да спадчыны пакалення пераможцаў — Сергяенка
22 чэрвеня, Мінск . У Брэсце сабраліся сябры Беларусі, якія падзяляюць беражлівае стаўленне да спадчыны пакалення пераможцаў. Гэта адзначыў першы намеснік старшыні Парламенцкага сходу Саюза Беларусі і Расіі, старшыня Палаты прадстаўнікоў Ігар Сергяенка ў Брэсце ў час пленарнага пасяджэння ІІ Міжнароднага форуму Саюзнай дзяржавы «Вялікая спадчына — агульная будучыня»,
«Мы рады бачыць у гераічным горадзе над Бугам шчырых сяброў Беларусі, людзей, якія падзяляюць наша беражлівае стаўленне да спадчыны пакалення пераможцаў і імкненне менавіта на гэтым фундаменце будаваць агульную будучыню для ўсіх краін і народаў», — сказаў Ігар Сергяенка. Ён таксама падзякаваў за тое, што госці прынялі запрашэнне, прыбылі, нягледзячы на складанасці маршрутаў многіх дэлегацый.
Запрашаючы да размовы на пленарным пасяджэнні, першы намеснік старшыні Парламенцкага сходу падкрэсліў, што арганізатары прыклалі максімум намаганняў, каб кожнае сказанае на форуме слова было пачута. «Нас бачаць і чуюць практычна ва ўсіх рэгіёнах нашай краіны. На пляцоўках форуму працуюць саюзныя сродкі масавай інфармацыі, больш як 200 журналістаў з розных краін. Пасяджэнне трансліруецца ў прамым эфіры», — праінфармаваў Ігар Сергяенка.
На адкрыцці пленарнага пасяджэння было зачытана прывітанне Прэзідэнта Рэспублікі Беларусь Аляксандра Лукашэнкі ўдзельнікам ІІ Міжнароднага форуму Саюзнай дзяржавы «Вялікая спадчына — агульная будучыня». 
Фота Андрэя Сіняўскага
