Выставу «Зямля неўміручасці» адкрылі ў мемарыяльным комплексе «Брэсцкая крэпасць-герой» да яго 55-годдзя
25 верасня, Брэст . Выставу «Зямля неўміручасці» адкрылі ў мемарыяльным комплексе «Брэсцкая крэпасць-герой» да яго 55-годдзя. Аб гэтым паведамілі ва ўстанове культуры.
Мемарыяльны комплекс на тэрыторыі легендарнай цытадэлі над Бугам быў адкрыты 25 верасня 1971 года. За гэтыя гады ён стаў знакавым месцам у сусветнай гісторыка-культурнай спадчыне. «У кожным камені, у кожным помніку і музейным экспанаце адлюстравана слаўнае мінулае і дастойнае сучаснае. Высокі інтэлектуальны ўзровень ваенных інжынераў і прафесіяналізм будаўнікоў заходняга фарпоста краіны, увекавечаныя ў фартыфікацыйных збудаваннях ХІХ стагоддзя, мужнасць і стойкасць абаронцаў Айчыны, увасобленыя ў манументальных помніках XХ стагоддзя, месцы бітваў, пахаванняў і памінання стварылі мемарыял, да якога не заканчваецца цікавасць і паток наведвальнікаў», — падкрэсліў дырэктар мемарыяльнага комплексу Аляксандр Каркатадзэ. 
У аснову выставы «Зямля неўміручасці» ўвайшлі матэрыялы з фондаў мемарыяльнага комплексу. Экспазіцыя складаецца з пяці планшэтаў, партрэтаў абаронцаў Брэсцкай крэпасці, дакументаў і кніг, якія расказваюць аб гераічнай абароне ў чэрвені — ліпені 1941 года, аб трагедыі пачатку Вялікай Айчыннай вайны праз лёсы ваеннаслужачых і членаў іх сем’яў. Адлюстравана роля пісьменніка Сяргея Смірнова ў даследаванні тэмы абароны цытадэлі. Прадстаўлены дакументы, якія сведчаць аб складаным працэсе адбору праектаў мемарыяла, яго аўтарах.
Убачыць выставу «Зямля неўміручасці» можна да 9 лістапада.
Мемарыяльны комплекс «Брэсцкая крэпасць-герой» уваходзіць у топ месцаў Беларусі і Брэсцкай вобласці, якія найбольш наведваюць. З пачатку бягучага года яго наведалі больш як 650 тыс. чалавек з 43 краін свету.
