Тысячы людзей у Дзень Незалежнасці сабраў вячэрні гала-канцэрт «Сімфонія стварэння»
3 ліпеня, Мінск . Каля стэлы «Мінск — горад-герой» праходзіць гала-канцэрт «Сімфонія стварэння», які стаў кульмінацыяй культурных падзей Дня Незалежнасці ў Мінску,
У Дзень Незалежнасці на сцэну для мінчан і гасцей выходзяць зоркі і маладыя асобы беларускай эстрады. Знаёмыя песні і новыя адкрыцці ствараюць асаблівы настрой свята і яднання.
Адной з артыстак стала Ірына Іршонак. Яна расказала, што сёння прэзентавала новую песню «Хустачка», якую прысвяціла ўсім беларускім жанчынам. «Для мяне гэта вялікі гонар. У сваю песню я ўклала тое, як складана быць свабоднай і яркай, але менавіта такімі мы ўсе, беларускія жанчыны, з’яўляемся — яркімі, моцнымі, якім не страшны ніякія цяжкасці. Гэта неверагодныя эмоцыі — прадстаўляць свой аўтарскі матэрыял на такую шырокую аўдыторыю і ў такое свята», — падзялілася яна. 
Артыстка адзначыла, што для яе Дзень Незалежнасці — гэта дзень гордасці за сваю краіну. «Як бы ні было цяжка, мы заўсёды адзін за аднаго. Незалежнасць для нас заўсёды важна. Мне вельмі прыемна, што гэта свята адзначаецца з такім размахам і людзі ганарацца сваёй краінай», — сказала Ірына Іршонак.
Выступаў сёння і народны артыст Беларусі Уладзімір Громаў. Ён адзначыў, што выступаць на сцэне каля стэлы «Мінск — горад-герой» для некалькіх тысяч людзей у Дзень Незалежнасці для яго асабліва ганарова. «Мне хочацца ўдзельнічаць у гэтай аб’яднальнай падзеі. Песні, якія гучаць, музыка — тое, што ўсіх аб’ядноўвае. Пазней адбудзецца рэспубліканская акцыя «Спяём гімн разам». Гэта мерапрыемства аб’ядноўвае нас», — сказаў ён. 
Артыст расказаў, што для яго Дзень Незалежнасці — гісторыя пра шлях, якім наша краіна ідзе ўжо шмат гадоў. «Усе, хто прыязджае да нас у краіну, знаходзяцца ў нейкім здзіўленні, а аказваецца, што і так таксама можна — цудоўна і чыста, прыгожа, дагледжана. Як кажуць, наша краіна ў парадку», — дадаў ён.
Канцэрт каля стэлы сабраў тысячы людзей. Разам з калегамі адсвяткаваць гэты дзень прыйшла Ганна Скурчык. «Мы пастаянна ходзім на такія мерапрыемствы, тут заўсёды вельмі душэўная атмасфера. Гэта аб’ядноўвае нас і развівае калектыўны дух. Мы з задавальненнем прыходзім, танцуем і размаўляем. Для нас гэта вельмі важнае гістарычнае і дзяржаўнае свята, таму мы шануем гэтыя традыцыі», — сказала яна.
Глядачка гала-канцэрта адзначыла, што ў Дзень Незалежнасці адчувае асаблівую гордасць за краіну і яе дасягненні. «У гэты дзень мы ўспамінаем падзеі 1944 года з асаблівай удзячнасцю і шануем нашых герояў. Амаль для кожнай сям’і гэта асабістая гісторыя. Таму гэты дзень выклікае слёзы. Мы цэнім сваю незалежнасць, таму што яна дасталася нам крывёй», — дадала Ганна Скурчык.
Фінальным акордам канцэрта каля стэлы стане рэспубліканская акцыя «Спяём гімн разам». А пасля яе неба расквеціць маляўнічы салют. 
Фота Андрэя Сіняўскага, Віталя Піваварчыка
