Дажынкі» палюбіліся людзям і сталі ўсенародным святам — Матусевіч
Дзмітрый Матусевіч 5 верасня, Баранавіцкі раён . Фестываль працаўнікоў вёскі «Дажынкі» палюбіўся людзям і стаў усенародным святам. Такое меркаванне выказаў намеснік кіраўніка Адміністрацыі Прэзідэнта Дзмітрый Матусевіч,
Брэсцкая вобласць першая ў Беларусі адзначае «Дажынкі». Свята прымае аграгарадок Жамчужны Баранавіцкага раёна. «Каравай у гэтым годзе нядрэнны. Брэсцкая вобласць завяршыла ўборку збожжавых і рапсу, але ёсць яшчэ шмат іншых задач. Уклад рэгіёна значны — больш за 1,6 млн т збожжа (з улікам рапсу. — Заўвага БЕЛТА). Гэта высокі паказчык, ураджайнасць таксама нядрэнная», — сказаў Дзмітрый Матусевіч. Ён акцэнтаваў увагу, што, вярнуўшыся з камандзіроўкі, кіраўнік дзяржавы адзначыў працу аграрыяў Брэсцкай вобласці, падпісаўшы шэраг даручэнняў, падзяк. Некаторыя з іх уручаны сёння. Астатнія знойдуць сваіх уладальнікаў пазней.
Першыя «Дажынкі» правялі ў Беларусі 30 гадоў таму. Іх сталіцай стаў Столін. Адрадзілі традыцыю па ініцыятыве кіраўніка дзяржавы. «Прэзідэнт — чалавек з народа. Ён добра разумее, што адбываецца ў краіне, што трэба людзям. Хтосьці можа сказаць, што гэта («Дажынкі». — Заўвага БЕЛТА) датычыцца толькі невялікага кола. Але на самай справе гэта ўсенароднае свята, якое людзі любяць. У любое надвор’е прыходзяць, весяляцца. Усім прыемна ўшаноўваць тых, хто асабліва вызначыўся», — заўважыў намеснік кіраўніка Адміністрацыі Прэзідэнта.
Старшыня Пастаяннай камісіі Савета Рэспублікі па заканадаўстве і дзяржаўным будаўніцтве, упаўнаважаны прадстаўнік кіраўніка дзяржавы ў Брэсцкай вобласці Міхаіл Русы быў сведкам правядзення першых у краіне «Дажынак». «Гэта быў новы падыход у гісторыі нашай маладой дзяржавы. Прэзідэнт прыняў рашэнне правесці «Дажынкі» ў лепшай вобласці, у Столінскім раёне. У рэгіёне тады было намалочана 770 тыс.т збожжа. Праз 30 гадоў рэзультат падвоілі і ў рэгіёне, і ў краіне. Нізкі паклон за працу, якую вы робіце», — падкрэсліў Міхаіл Русы, звяртаючыся да аграрыяў.
Ён дадаў, што апошнім часам члены Савета Рэспублікі наведалі і даволі грунтоўна папрацавалі ў многіх рэгіёнах Брэсцкай вобласці. «На свае вочы пераканаліся, чаму Брэстчына мае такі рэзультат. Сем’і, кожны чалавек з павагай ставіцца да кожнага кавалка зямлі. Атрымліваюць не толькі збожжа, але і ягады, і плады, і бульбу — забяспечваюць харчовую бяспеку нашай краіны», — рэзюмаваў упаўнаважаны прадстаўнік кіраўніка дзяржавы ў Брэсцкай вобласці.
У час цырымоніі ўшаноўвання адзначаны лепшыя гаспадаркі, інжынеры сельгасарганізацый, камбайнеры, вадзіцелі, аграномы, аператары зернесушыльных комплексаў. Заахвочаны прадстаўнікі іншых прафесій, якія дапамагалі аграрыям убіраць ураджай.
Фота Віялеты Южаковай
