Трэць хірургічных аперацый у Полацкім раёне праводзіцца малаінвазіўным метадам — галоўурач ЦГБ
19 чэрвеня, Полацк . Трэць хірургічных аперацый у Полацкім раёне праводзіцца малаінвазіўным метадам — пытанні сферы аховы здароўя абмеркавалі на пасяджэнні райвыканкама, у якім прыняла ўдзел старшыня Савета Рэспублікі Нацыянальнага сходу Беларусі Наталля Качанава,
У Полацкім раёне жыве амаль 98,5 тыс. чалавек. У сферы аховы здароўя функцыянуюць 33 структурныя падраздзяленні рознага ўзроўню. Для пацыентаў у бальніцах ёсць 633 ложкі, уключаючы 495 кругласутачнага знаходжання.
Дзякуючы новаму медыцынскаму абсталяванню да 2,5 месяца зменшылася чарга чакання на эндапратэзаванне. За мінулы год у раёне правялі 62 малаінвазіўныя хірургічныя ўмяшанні, што склала 30 працэнтаў ад агульнай колькасці аперацый.
Удзельнікі пасяджэння закранулі пытанне дыспансерызацыі. Наталля Качанава звярнула ўвагу, як важна праводзіць максімальна інфарматыўнае абследаванне, а не абмяжоўвацца назначэннем лабараторных даследаванняў.
Адна з асноўных задач у ахове здароўя Полацкага раёна — папаўненне кадрамі і замацаванне маладых спецыялістаў на месцах. Учора медыкам уручылі ключы ад арэнднага жылля, усяго на гэты год для ўрачоў Полацка прадугледжана каля 40 такіх кватэр. Старшыня Полацкага райвыканкама Васіль Шылаў падкрэсліў, што пры неабходнасці раённыя ўлады будуць шукаць рэзервы для вырашэння жыллёвага пытання маладых спецыялістаў і тых урачоў, у якіх маюць патрэбу паліклінікі і бальніцы, але запыт павінен ісці ад кіраўнікоў устаноў аховы здароўя.
Ранняя прафарыентацыйная работа і мэтавыя дагаворы на навучанне будучых медыкаў — важны складнік у кадравым забеспячэнні сферы аховы здароўя. Наталля Качанава падкрэсліла: «Важна, каб у маладых медыкаў была магчымасць вярнуцца на малую радзіму, каб пасля абавязковай адпрацоўкі яны засталіся на першым месцы работы».
Старшыня Савета Рэспублікі па выніку абмеркавання адзначыла, што пытанне аховы здароўя — адно з ключавых на парадку дня ў развіцці краіны і заўсёды знаходзіцца на кантролі кіраўніка дзяржавы. «У нашай краіне рабочая група выязджае і дае ацэнку сістэмы аховы здароўя на месцах, не проста кантралюючы, а падказваючы вузкія месцы ў сістэме. Сёння галоўнаму ўрачу санітарнай службы раёна было ўказана, што трэба больш увагі ўдзяляць пытанням яго сферы», — сказала Наталля Качанава.
Закранаючы пытанне кадравай забяспечанасці, яна падкрэсліла, што ўрачоў і медсясцёр у рэспубліцы рыхтуюць дастаткова. «Самае галоўнае – зрабіць усё, каб замацаваць маладых спецыялістаў на месцах. Разгледзелі мы пытанні забяспечанасці арэндным жыллём. У Полацку з гэтым добра выбудавана работа – у гэтым годзе работнікам сістэмы аховы здароўя будзе выдзелена 38 кватэр. Учора ўручылі ключы ад 13 арэндных кватэр. Што датычыцца мэтавых накіраванняў, падрыхтоўкі кадраў, гэта сістэма выбудавана ў нашай краіне дастаткова паспяхова. Важна, каб маладыя людзі, якія атрымліваюць адукацыю ў сферы аховы здароўя, маглі вярнуцца на сваю малую радзіму, каб прынесці карысць свайму раёну», — рэзюмавала спікер. 
Фота Аляксандра Хітрова
