Сталі вядомы ўсе прызёры адкрытага чэмпіянату Беларусі па лыжаролерах
Фота skisport.by 29 верасня, Мінск . На базе РЦАП па зімовых відах спорту «Раўбічы» вызначыліся ўсе пераможцы і прызёры адкрытага чэмпіянату Беларусі па гонках на лыжаролерах,
На спаборніцтвах разам з беларускімі лыжнікамі выступілі спартсмены з Расіі, усяго ўдзельнікі разыгралі шэсць камплектаў узнагарод. У актыве нашай каманды восем медалёў (адна залатая ўзнагарода, чатыры сярэбраныя і тры бронзавыя), на рахунку гасцей дзесяць прызавых месцаў (5-2-3).
У заключны дзень турніру, 29 верасня, адбыліся гонкі з масавым стартам на 20 кіламетраў класічным стылем. Заваявалі перамогі расіяне Арына Тараноўская і Мікіта Ягораў, у жаночым забегу другой фінішавала беларуска Вікторыя Жамкова.
Раней у «Раўбічах» лепшыя рэзультаты ў каньковым спрынце паказалі наш Дзяніс Філімонаў і Вікторыя Лукашова з Расіі. У індывідуальных гонках на 10 кіламетраў поспех святкавалі прадстаўнікі расійскай каманды Арына Тараноўская і Ягор Салдаткін.
Прызёрамі нацыянальнага першынства ў спрынце сталі беларусы Ілья Коршунаў, Лізавета Пугачова і Валерыя Душычава, на подыум па выніках гонак з раздзельнага старту падымаліся нашы Вікторыя Жамкова, Ірына Краўцова і Міхаіл Сямёнаў. Камандны залік выйграла зборная Магілёўскай вобласці.
