Сярэдняе звяно кіравання адновяць у аграарганізацыях Магілёўскай вобласці
23 верасня, Чавусы . Аднаўленне сярэдняга звяна кіравання ў буйных сельскагаспадарчых арганізацыях дасць магчымасць павысіць эфектыўнасць работы без дадатковых фінансавых затрат. Аб гэтым журналістам пасля нарады ў Чавускім райвыканкаме расказаў кіраўнік Адміністрацыі Прэзідэнта Дзмітрый Крутой,
Паводле яго слоў, першы год пяцігодкі падыходзіць да завяршэння, і аграпрамысловы комплекс застаецца ключавым сектарам эканомікі Магілёўшчыны. Сітуацыю ў галіне прэзідэнт краіны кантралюе ў штомесячным рэжыме, удзяляючы асаблівую ўвагу праблемным раёнам. Ён прывёў у прыклад Шклоўскі раён, дзе кіраўнік дзяржавы наведаў адну з самых слабых гаспадарак — ААТ «Гавяды-агра». Там былі дадзены даручэнні сістэмнага характару, якія сёння былі агучаны старшыням усіх райвыканкамаў вобласці.
Адной з галоўных тэм стала змяненне структуры кіравання пасля кампаніі па ўзбуйненні сельгасарганізацый. У рэгіёне, як і ў цэлым па краіне, каля 90% слабых гаспадарак былі ліквідаваны, а іх землі і базы далучаны да прадпрыемстваў-лідараў. Аднак гэта прывяло да разрыву сувязі паміж радавымі работнікамі і кіраўніцтвам буйных аб’яднанняў. «Наш Прэзідэнт адчуў, што менавіта сувязь паміж канкрэтнымі механізатарамі, рабочымі, людзьмі, якія працуюць у полі, і кіраўнікамі вось гэтай аб’яднанай гаспадаркі стала няўстойлівай і неканкрэтнай», — растлумачыў Дзмітрый Крутой.
Праблема заключаецца ў адсутнасці сярэдняга звяна кіравання — начальнікаў участкаў. На прыкладзе той жа гаспадаркі «Гавяды-агра», тэрыторыя якой распасціраецца на 40-50 км, штодзённы кантроль за выкананнем тэхналагічных рэгламентаў становіцца цяжкім без прамежкавых кіраўнікоў. «Вось гэты штодзённы кантроль, які забяспечвалі б у тым ліку начальнікі ўчасткаў, калі б яны былі, даў бы магчымасць, не патрабуючы нейкіх вялікіх фінансавых і іншых затрат, кардынальна павысіць эфектыўнасць», — падкрэсліў Дзмітрый Крутой.
Цяпер гэта работа праводзіцца ўжо ў Шклоўскім раёне, каб да лістапада далажыць Прэзідэнту аб першых выніках. Кіраўнік Адміністрацыі даручыў усім старшыням райвыканкамаў, на тэрыторыях якіх ёсць узбуйненыя сельгасарганізацыі, вывучыць гэта пытанне і ўкараніць такую практыку.
Фота Алега Файніцкага
