Сякрэта: барацьба з гераізацыяй нацызму мае для Беларусі асаблівае гістарычнае і маральнае значэнне
Ігар Сякрэта. Фота МЗС 21 кастрычніка, Мінск . Памяць аб ахвярах вайны і гераізме тых, хто змагаўся супраць нацысцкай ідэалогіі, з’яўляецца неад’емнай часткай беларускай нацыянальнай ідэнтычнасці. Аб гэтым намеснік міністра замежных спраў Беларусі Ігар Сякрэта заявіў у час выступлення ў фармаце відэа-канферэнц-сувязі на міжнародным праваабарончым мерапрыемстве «Венскія дыскусіі», паведамілі ў прэс-службе МЗС.
На форуме, паводле слоў намесніка міністра, узняты пытанні, якія маюць асаблівае значэнне не толькі з пункту гледжання міжнародных абавязацельстваў у галіне правоў чалавека, але і ў кантэксце сучасных палітычных і гуманітарных выклікаў, з якімі сутыкаецца рэгіён адказнасці АБСЕ. Гэта тыя тэмы, якія моцна палітызуюцца альбо наогул ігнаруюцца заходняй супольнасцю.
Напрыклад, для Беларусі — гэта процідзеянне гераізацыі нацызму і яго памагатых, неанацызму, шавінізму, агрэсіўнаму нацыяналізму. Для Мінска гэта тэма мае асаблівае гістарычнае і маральнае значэнне, падкрэсліў Ігар Сякрэта. Беларускі народ перажыў вельмі цяжкія выпрабаванні ў гады Вялікай Айчыннай вайны і ўнёс значны ўклад у перамогу над нацызмам.
«Памяць аб ахвярах вайны, разбураных гарадах і спаленых вёсках, аб лёсах мірных жыхароў і гераізме тых, хто змагаўся супраць нацысцкай ідэалогіі, з’яўляецца неад’емнай часткай нашай нацыянальнай ідэнтычнасці, — заявіў дыпламат. — Таму любыя спробы апраўдання нацызму, гераізацыі яго памагатых, рэабілітацыі чалавеканенавісніцкіх ідэалогій або прыніжэння злачынстваў Другой сусветнай вайны не могуць разглядацца як другарадныя пытанні гістарычнай дыскусіі. Яны закранаюць асновы пасляваеннага еўрапейскага парадку і маюць рызыкі для будучых пакаленняў».
Ігар Сякрэта падкрэсліў, што сёння, калі ў краінах Еўропы ўзмацняюцца вострыя спрэчкі аб гістарычнай памяці, нацыянальнай ідэнтычнасці і ацэнцы падзей мінулага, асабліва важна не дапусціць падмены гістарычных фактаў палітычнай мэтазгоднасцю.
«Барацьба з неанацызмам патрабуе паслядоўнай адукацыйнай і асветнай работы, якую на рэгулярнай аснове праводзяць Мінск і Масква, у тым ліку і на пляцоўках АБСЕ», — сказаў намеснік кіраўніка МЗС.
Так, зусім нядаўна ў венскім Хофбургу дыпламатычныя місіі Беларусі і Расіі правялі міжнародны круглы стол, прысвечаны 85-й гадавіне стварэння нацысцкага лагера смерці Малы Трасцянец пад Мінскам. Гэта мерапрыемства з лейтматывам «Агульнае ў памяці розных культур» стала спробай перайсці да цэласнага дыялогу, заснаванага на агульнай адказнасці за захаванне памяці аб ахвярах нацызму, адзначыў дыпламат.
Мерапрыемства было арганізавана ў Вене пад эгідай Пастаяннага прадстаўніцтва Расіі пры АБСЕ і пры падтрымцы Пастаяннага прадстаўніцтва Беларусі пры АБСЕ. У форуме прынялі ўдзел кіраўніцтва знешнепалітычных, іншых дзяржаўных і грамадскіх ведамстваў Беларусі і Расіі, прадстаўнікі швейцарскага старшынства АБСЕ, дыпламаты, эксперты і актывісты грамадскіх арганізацый з Беларусі, Расіі, Швейцарыі, Казахстана, Ізраіля, Венгрыі, Босніі і Герцагавіны, Іспаніі, Сербіі, Таджыкістана, Кыргызстана, ЗША, Польшчы, Грэцыі, Латвіі і Літвы, а таксама профільных інстытутаў АБСЕ.
