Пяціборцы Гнедчык і Несцераў выйгралі Кубак Саюзнай дзяржавы ў Маскве
Марыя Гнедчык і Уладзіслаў Несцераў 5 верасня, Мінск . Беларусы Марыя Гнедчык і Уладзіслаў Несцераў сталі пераможцамі Кубка Саюзнай дзяржавы па сучасным пяцібор’і ў сталіцы Расіі,
Удзел у турніры ў фармаце змешанай эстафеты прынялі 12 дуэтаў з шасці краін: па чатыры пары з Беларусі і Расіі, а таксама па адной з Егіпта, Казахстана, Кыргызстана і Узбекістана. На спаборніцтвах выступілі лідары нашай нацыянальнай каманды, у тым ліку тры чэмпіёнкі свету 2026 года. У склад егіпецкага дуэта ўвайшоў алімпійскі чэмпіён Парыжа Ахмед Эль-Гендзі.
Пасля фехтавання, плавання і паласы перашкод Гнедчык і Несцераў ішлі чацвёртымі на 30 секунд пасля лідараў, але на сваім этапе лазер-рана Марыя вывела каманду на першае месца. Уладзіслаў на другой частцы дыстанцыі захаваў лідарства і нават павялічыў адрыў ад праследавацеляў. Нашы пяціборцы на 18 секунд апярэдзілі Вікторыю Сазонаву і Ягора Грамадскага з Расіі.
У барацьбе за бронзу беларусы Віялета Гурэева і Уладзіслаў Мелказераў толькі ў фінішным створы ўступілі расіянам. Пара Настасся Арол — Яўген Арол заняла сёмае месца, яшчэ адзін наш дуэт Мілана Певец — Максім Марук стаў дзявятым. У мінулым годзе ўладальнікамі Кубка Саюзнай дзяржавы ў Маскве былі Настасся Арол і Акім Гнедчык.
