Пагадненне аб эканамічным партнёрстве ЕАЭС з ААЭ ўступіла ў сілу
Фота з архіва 6 кастрычніка, Мінск . Пагадненне аб эканамічным партнёрстве паміж Еўразійскім эканамічным саюзам і яго дзяржавамі-ўдзельніцамі, з аднаго боку, і Аб’яднанымі Арабскімі Эміратамі, — з другога, падпісанае ў чэрвені 2025 года, уступіла ў сілу, паведамілі ў прэс-службе ЕЭК.
Пагадненне прадугледжвае істотную лібералізацыю гандлёвага рэжыму: ААЭ прадаставілі прэферэнцыяльны доступ для 86% таварнай наменклатуры, што адпавядае 98% аб’ёму экспарту ЕАЭС.
«Сярэдняя стаўка, якая прымяняецца партнёрам да тавараў саюза, скарачаецца з 5% да 0,6%. Атрыманы аб’ём уступак, паводле нашай ацэнкі, дасць магчымасць экспарцёрам краін ЕАЭС штогод эканоміць на мытных пошлінах да $266 млн, — адзначыў член Калегіі (міністр) па гандлі Еўразійскай эканамічнай камісіі Андрэй Сляпнёў. — Чаканы рост тавараабароту складзе як мінімум $5-6 млрд у сярэднетэрміновай перспектыве».
У пагадненні замацаваны сучасныя палажэнні і механізмы, накіраваныя на развіццё ўзаемадзеяння дзелавых колаў, уключаючы малыя і сярэднія прадпрыемствы. Прадугледжана супрацоўніцтва ў галіне транспарту і лагістыкі з магчымасцю падключэння ААЭ да міжнароднага калідора «Поўнач — Поўдзень».
Міністр ЕЭК заклікаў бізнес краін ЕАЭС актыўна выкарыстоўваць новыя магчымасці і развіваць супрацоўніцтва з эмірацкім бокам.
