МЗС: ідзе адбор найбольш цікавых ідэй для фінансавання сумесных праектаў Беларусі і Амана
Максім Рыжанкоў 3 чэрвеня, Мінск . Цяпер ідзе адбор самых цікавых ідэй для фінансавання сумесных праектаў Беларусі і Амана. Аб гэтым расказаў міністр замежных спраў Беларусі Максім Рыжанкоў перад пачаткам Беларуска-аманскага бізнес-форуму ў Мінску,
Максім Рыжанкоў адзначыў, што на поўную моц пачаў працаваць сумесны інвестыцыйны фонд Беларусі і Амана, галоўная задача якога — фінансаванне сумесных праектаў. «Яго партфель ужо даволі значны. Цяпер ідзе адбор найбольш цікавых ідэй для ўкладання сродкаў з мэтай павелічэння вытворчасці і стварэння канечнага прадукту. Гэты тавар будзе рэалізоўвацца не толькі ў Беларусі і Амане, але і пойдзе ў краіны ЕАЭС (з улікам выгаднага пазіцыянавання Беларусі ў гэтым аб’яднанні), а таксама ў краіны Азіяцкага рэгіёна, з якімі ў Амана існуюць цесныя кантакты і прэферэнцыйныя гандлёвыя пагадненні. Гэта Індыя, краіны Персідскага заліва, дзяржавы Усходняй Афрыкі», — расказаў міністр. 
У цэлым знешнепалітычнае ведамства Беларусі задавальняе развіццё супрацоўніцтва з дружалюбным Аманам. «Нагадаю, што ў аснове гэтых адносін цесныя, асабістыя і даверныя стасункі паміж Султанам Амана Хейсамам бен Тарыкам Аль Саідам і Прэзідэнтам Беларусі Аляксандрам Лукашэнкам. Менавіта гэтыя дамоўленасці на вышэйшым узроўні заклалі фундамент усіх напрамкаў супрацоўніцтва, якімі мы займаемся сёння», — адзначыў міністр.
Паводле яго слоў, вельмі важна, што за апошнія некалькі месяцаў праводзіцца ўжо другі Беларуска-аманскі бізнес-форум. «Першы прайшоў зусім нядаўна ў Маскаце, а другі — сёння ў Мінску. І, вядома, мы ўжо бачым канкрэтныя вынікі. Калі на першым форуме бакі прыглядаліся адзін да аднаго, шукалі агульныя інтарэсы і новыя магчымасці для вядзення бізнесу і інвесціравання, то на сёлетнім форуме ў Мінску ўжо дасягнуты канкрэтныя дамоўленасці, вызначаны аб’ёмы інвестыцый і падрыхтаваны шэраг кантрактаў, якія ў бліжэйшы час прасунуць наперад наш двухбаковы гандаль», — падкрэсліў Максім Рыжанкоў.
Цяперашні візіт аманскай дэлегацыі ў Беларусь — адзін з самых маштабных за апошні час, калі гаварыць аб кансалідаванай дэлегацыі дзелавых колаў. На мерапрыемства зарэгістравалася больш за 200 прадстаўнікоў кампаній, прыкладна пароўну — аманскіх і беларускіх. 
На пляцоўцы Беларуска-аманскага бізнес-форуму ў Мінску ўдзельнікі змогуць абмеркаваць перспектыўныя напрамкі ўзаемадзеяння з патэнцыяльнымі партнёрамі ў рамках прамых B2B-перагавораў. Мова форуму — англійская.
Фота Сяргея Шэлега
