Міжнародны водны форум пройдзе ў Мінску ў верасні
Фота з архіва 5 чэрвеня, Мінск . У Мінску ў верасні пройдзе Міжнародны водны форум. Аб гэтым журналістам паведаміла дырэктар Цэнтральнага навукова-даследчага інстытута комплекснага выкарыстання водных рэсурсаў (ЦНДІКВВР) Вольга Каўзунова,
Паводле слоў дырэктара ЦНДІКВВР, у верасні ў Мінску плануецца правядзенне Міжнароднага воднага форуму, які збярэ вялікую колькасць беларускіх і замежных спецыялістаў для абмеркавання актуальных пытанняў і перспектыў супрацоўніцтва. Форум прымеркаваны да 65-годдзя з дня ўтварэння РУП «ЦНДІКВВР».
На форуме плануецца абмеркаваць пытанні ацэнкі і маніторынгу стану паверхневых і падземных вод, захаванне і аднаўленне водных экасістэм, уключаючы крыніцы і ўнікальныя аб’екты, інавацыйныя тэхналогіі рацыянальнага выкарыстання водных рэсурсаў. Таксама на секцыях форуму пойдзе размова аб інтэграваным кіраванні воднымі рэсурсамі і развіцці інфраструктуры. Яшчэ адна з тэм — экалагічная адукацыя і фарміраванне экалагічнай культуры.
Паводле слоў Вольгі Каўзуновай, пытанні вывучэння, аховы і рацыянальнага выкарыстання водных рэсурсаў заўсёды знаходзяцца ў цэнтры ўвагі дзяржавы. Цэнтральны навукова-даследчы інстытут комплекснага выкарыстання водных рэсурсаў выконвае як фундаментальныя, так і прыкладныя даследаванні ў гэтай галіне. Арганізацыя праводзіць работу па інвентарызацыі паверхневых водных аб’ектаў. «Па стане на 1 студзеня 2026 года ў Беларусі налічваецца 24 554 паверхневыя водныя аб’екты. З іх 10 897 — вадацёкі, 12 460 — вадаёмы. Колькасць крыніц — 1197», — адзначыла дырэктар ЦНДІКВВР.
Таксама Вольга Каўзунова згадала, што інстытут з 2023 года выступае ініцыятарам правядзення экалагічнай акцыі па захаванні крыніц. «Мы прыцягваем неабыякавых грамадзян з мэтай навядзення парадку на дробных крыніцах. Акрамя гэтага, штогод праводзім конкурс «Раскажы аб сваёй крыніцы», дзе людзі расказваюць аб крыніцах, прысылаюць фатаграфіі, паказваюць, як дапамагаюць добраўпарадкаванню. Мы ўносім крыніцы ў пералік, публікуем і ўзнагароджваем неабыякавых грамадзян», — растлумачыла яна.
