Лукашэнка на сустрэчы з Пуціным: тавараабарот паміж Беларуссю і Расіяй значна расце
10 лістапада, Масква . Тавараабарот Беларусі і Расіі значна расце. Аб гэтым Прэзідэнт Беларусі Аляксандр Лукашэнка заявіў на сустрэчы з Прэзідэнтам Расіі Уладзімірам Пуціным,
«Я вельмі цаню ўсе нашы сустрэчы, нашы кантакты. У нас сапраўды добрыя, блізкія адносіны. Практычна няма ніякіх рознагалоссяў на сёння перад Новым годам, як гэта было раней. Гэта сведчыць аб добрай дынаміцы. Вы сказалі аб тавараабароце: ён сапраўды ў гэтым годзе значна расце, працэнтаў на 20, недзе 21 з лішкам, — сказаў Аляксандр Лукашэнка. — Мы гандлюем патрэбнымі для Беларусі і Расіі таварамі — гэта добра».
Беларускі лідар таксама пагадзіўся з пазітыўнай ацэнкай, якую яго расійскі калега даў рабоце ўрадаў дзвюх краін. «Сапраўды, урады малайцы, працуюць добра. Усе задачы, якія мы перад імі ставілі, яны рэалізоўваюць», — падкрэсліў ён. 
«Я аб гэтым сказаў: я ганаруся тым, што нам удалося практычна вырашыць усе праблемныя вузлы, — дадаў Аляксандр Лукашэнка. — Два-тры пытанні, па якіх хацеў пракансультавацца. Гэта не тыя пытанні, якія трэба вырашаць (яны вырашаны ўсе), а пракансультавацца на будучыню і параіцца».
Месцам сустрэчы кіраўнікоў дзяржаў стала падмаскоўная дзяржаўная рэзідэнцыя Нова-Агарова.
Як паведамлялася , Прэзідэнт Беларусі Аляксандр Лукашэнка 10 лістапада прыбыў з рабочым візітам у Расійскую Федэрацыю. Сустрэча з Уладзімірам Пуціным адбылася напярэдадні сесіі Савета калектыўнай бяспекі Арганізацыі дагавора аб калектыўнай бяспецы, якая пройдзе 11 лістапада ў Маскве. Лідары краін абмяркуюць пытанні дзейнасці АДКБ, разгледзяць актуальныя праблемы міжнароднай і рэгіянальнай бяспекі.
У сваім выступленні Прэзідэнт Беларусі падрабязна спыніцца на пытаннях забеспячэння калектыўнай бяспекі на еўразійскай прасторы, прадставіць пазіцыю Мінска па ключавых напрамках развіцця арганізацыі. 
