Колькасць электрамабіляў у Беларусі вырасла на 15 тыс. у бягучым годзе
22 жніўня, Мінск . Як Беларуская атамная электрастанцыя садзейнічае развіццю электратранспарту, расказаў журналістам міністр энергетыкі Дзяніс Мароз у час аўтапрабегу «БелАЭС — чыстая энергія мірнага атама»,
Беларуская атамная электрастанцыя забяспечвае каля 40% агульнага спажывання электраэнергіі ў краіне. На гэты час яна выпрацавала больш за 65,5 млрд кВт.гадз электраэнергіі. Гэты рэзультат дае магчымасць замяшчаць спажыванне прыроднага газу і тым самым зніжаць валютную нагрузку на эканоміку Беларусі.
Будаўніцтва атамнай электрастанцыі стала адным з фактараў, якія далі імпульс развіццю электратранспарту ў краіне. «З’яўленне надзейнай і стабільнай крыніцы электраэнергіі дало магчымасць сфарміраваць падыходы, стымулюючыя развіццё электратранспарту. Сёння па дарогах Беларусі ездзіць больш за 65 тыс. электрамабіляў. У параўнанні з аналагічным перыядам мінулага года паказчык вырас амаль удвая», — сказаў міністр энергетыкі.
У пачатку 2026 года ў краіне налічвалася каля 50 тыс. электрамабіляў. Больш як за паўгода іх колькасць павялічылася прыкладна на 15 тыс.
Міністр энергетыкі дадаў: «Развіццё электратранспарту дае не толькі дадатковы камфорт перамяшчэння, зніжае шумавую і экалагічную нагрузку, але і дае магчымасць павялічыць сумарны эканамічны эфект: скарачаецца спажыванне паліва, а значыць, змяншаецца валютная нагрузка на эканоміку».
Паводле яго слоў, Беларусь — адзін з лідараў на постсавецкай прасторы па колькасці электрамабіляў на душу насельніцтва. Перад краінай таксама пастаўлена задача да 2030 года павялічыць парк электрамабіляў да 300 тыс. — гэта каля 10% агульнай колькасці аўтамабіляў.
Адначасова развіваецца зарадная інфраструктура. «Яшчэ некалькі гадоў таму ў Беларусі было каля 1 тыс. электразарадных станцый пры парку прыкладна 10-12 тыс. электрамабіляў. Сёння электрамабіляў ужо больш за 65 тыс., а колькасць зарадных станцый перасягае 2,7 тыс.», — сказаў міністр.
З пачатку 2026 года сетка павялічылася прыкладна на 500 станцый. Да 2030 года плануецца давесці агульную колькасць электразарадных станцый да 15 тыс.
«Каб забяспечыць паўнацэнны камфорт перамяшчэння на электрамабілях, трэба развіваць зарадную інфраструктуру не толькі ўнутры населеных пунктаў, але і ўздоўж аўтамабільных дарог. Сёння практычна на ўсіх аўтазапраўках «Беларуснафты» ўстаноўлены зарадныя станцыі. Іх пакуль недастаткова, асабліва высокая нагрузка адчуваецца ў выхадныя дні, аднак існуюць дзяржаўныя праграмы па развіцці зараднай інфраструктуры, якія ўключаюць прыцягненне дадатковых аператараў. Яны будуць развіваць зарадную інфраструктуру на трасах і ўстанаўліваць хуткія і суперхуткія зарадныя комплексы», — сказаў на заканчэнне Дзяніс Мароз.
Мерапрыемства «БелАЭС — чыстая энергія мірнага атама» накіравана на папулярызацыю дасягненняў Беларусі ў сферы атамнай энергетыкі, ролі Беларускай атамнай станцыі ў развіцці экалагічных сегментаў эканомікі, уключаючы электратранспарт. Арганізатарам акцыі выступае Міністэрства энергетыкі пры падтрымцы дзяржкарпарацыі «Расатам», садзейнічанні Мінгарвыканкама і Астравецкага райвыканкама.
