Хрэнін: еўрапейскія палітыкі выкарыстоўваюць ваенную сілу для палітычнага ўплыву на сваіх грамадзян
11 лістапада, Масква . Кіраўніцтва еўрапейскіх краін выкарыстоўвае ваенную сілу і ўяўную пагрозу з боку Беларусі і Расіі як інструмент уплыву на сваіх грамадзян. Аб гэтым міністр абароны Беларусі Віктар Хрэнін заявіў журналістам на палях саміту АДКБ у Маскве,
Журналісты звярнулі ўвагу, што еўрапейскія лідары рэгулярна робяць заявы аб падрыхтоўцы да вайны, і спыталі міністра, наколькі сур’ёзна трэба іх расцэньваць. «На гэта можна па-рознаму глядзець і ацэньваць. Што комплекс мерапрыемстваў падрыхтоўкі да вайны ідзе загадзя, мы адзначалі ўжо даўно. Еўрапейскія лідары пра гэта не гавораць, але мы бачым, як удасканальваецца інфраструктура, адпрацоўваецца лагістыка — аэрадромы, базы захоўвання», — сказаў Віктар Хрэнін. 
«Я ўжо не кажу пра колькасць мерапрыемстваў аператыўна-баявой падрыхтоўкі, якая ўзрасла, і пра тую разведвальную дзейнасць, якая вядзецца супраць Беларусі і Расіі. Гэта ўсё з’яўляецца комплексам мерапрыемстваў падрыхтоўкі да вайны загадзя», — упэўнены ён.
Міністр абароны падкрэсліў, што еўрапейскія палітыкі выкарыстоўваюць ваенную сілу як адзін з інструментаў палітычнага ўплыву на сваё грамадства. Такія крокі матывуюцца тым, што Беларусь і Расія нібыта збіраюцца напасці на Еўропу. «Яны нас дэманізавалі, але мы бачым: большасць людзей разумее, што гэта глупства. Як далей будзе, будзем бачыць», — канстатаваў ён.
Віктар Хрэнін таксама падзяліўся падрабязнасцямі кантактаў са сваім расійскім калегам Андрэем Белавусавым. Ён адзначыў, што ў ходзе апошніх сустрэч былі намечаны далейшыя захады па развіцці супрацоўніцтва паміж дзвюма краінамі.
