Грузінскія рэферы рассудзяць матч футбалістаў Беларусі і Сан-Марына ў Лізе нацый
Фота з архіва 12 лістапада, Мінск . На футбольных арэнах Еўропы аднаўляюцца сустрэчы групавога этапу Лігі нацый УЕФА,
Футбалісты нацыянальнай зборнай Беларусі сёння згуляюць у Серавале з аўтсайдарам групы C1 камандай Сан-Марына (пачатак матча ў 22.45; прамая трансляцыя на тэлеканале «Спорт ТБ»). Гэту сустрэчу рассудзіць брыгада грузінскіх арбітраў, якую ўзначаліць Георгій Кікачэйшвілі. У першым крузе беларусы ўпэўнена перайгралі санмарынцаў у Будапешце з сухім лікам 4:0. Галоўны трэнер беларусаў Віктар Ганчарэнка адзначыў, што хоць футбалісты Сан-Марына прайгралі ўсе паядынкі, яны могуць зрабіць сюрпрыз любому саперніку, і таму ніякай расслабленасці быць не можа — трэба гуляць на поўную моц і даказваць сваю перавагу на полі. Заключную сустрэчу гэтага сезона беларускія футбалісты правядуць 15 лістапада ў Будапешце з лідарам групы камандай Албаніі. У першым крузе ў Тыране албанцы былі мацнейшыя — 2:0. Акрамя таго, зборная Беларусі двойчы згуляла з фінамі: у Хельсінкі сапернікі не выявілі пераможца — 0:0, а ў намінальна дамашнім паядынку ў венгерскай сталіцы наша каманда выйграла з мінімальнай перавагай — 1:0. Турнірнае становішча пасля чатырох дзён гульні: Албанія — 9 ачкоў, Беларусь — 7, Фінляндыя — 7, Сан-Марына — 0.
Групавыя этапы ва ўсіх дывізіёнах Лігі нацый завершацца 17 лістапада. Вясной 2027 года барацьбу за ўзнагароды прадоўжаць каманды, якія занялі 1-2-е месцы ў чатырох квартэтах лігі A. Чвэрцьфіналы адбудуцца ў сакавіку, затым чатыры лепшыя зборныя выйдуць у фінальную стадыю, якая пройдзе ў чэрвені.
Пераможцы лігі B выйдуць у лігу A, чатыры лепшыя каманды лігі C пяройдуць у лігу B. Акрамя таго, у сувязі са змяненнем фармату турніру ўсе каманды лігі D атрымаюць пропускі ў лігу C. Пачынаючы з сезона-2028/29 удзельнікі Лігі нацый УЕФА будуць падзелены на тры лігі. У кожным з трох дывізіёнаў A, B, C будзе сфарміравана па тры групы з шасці каманд.
Трыумфатарам Лігі нацый двойчы станавілася зборная Партугаліі (2019, 2025), па адным разе яе выйгравалі футбалісты Францыі (2021) і Іспаніі (2023).
