«Эмоцыі зашкальваюць». Удзельнікі праекта «Поезд Памяці» аб ваенна-гістарычнай рэканструкцыі
22 чэрвеня, Брэст . Удзельнікі праекта «Поезд Памяці» падзяліліся з карэспандэнтам БЕЛТА ўражаннямі ад наведвання ваенна-гістарычнай рэканструкцыі абароны Брэсцкай крэпасці, якая па традыцыі прайшла на світанні 22 чэрвеня.
Арэвік Акапян з Арменіі ніколі не была ў Беларусі і ўразілася маштабамі рэканструкцыі. «У Брэсце вельмі прыгожа і шмат усяго цікавага, але больш за ўсё мне якраз запомніліся гісторыі пра крэпасць і тых людзей, якія тут пралівалі сваю кроў. У Арменіі мы шмат чытаем пра вайну ў кнігах, але адна справа чытаць, а другая — убачыць такое дзеянне на свае вочы», — адзначыла школьніца. Яна таксама выказала жаданне пабываць ва ўсіх гарадах Беларусі і бліжэй пазнаёміцца з нашымі хлопцамі і дзяўчатамі.
Алена Карабейнікава з Санкт-Пецярбурга, паводле яе слоў, запомніць рэканструкцыю на ўсё жыццё. «Шмат гукавых эфектаў, таму адбываецца поўнае паглыбленне. Вельмі маштабна. Эмоцыі зашкальваюць», — падкрэсліла дзяўчына.
Яна дадала, што гісторыя яе сям’і таксама звязана з вайной. Адзін яе прадзед памёр 8 мая 1945 года, не дажыўшы ўсяго дзень да Вялікай Перамогі, а другі вярнуўся з вайны без ног. Таму ўбачанае ў Брэсцкай крэпасці для Алены не проста гістарычная рэканструкцыя — гэта напамін аб баявым шляху родных людзей.
У планах Максіма Дэкамбена з Францыі — наведаць як мага больш месцаў, якія вяртаюць нас да памяці, і лепш даведацца пра гісторыю. «У Беларусі я ўпершыню. Мне мала што вядома аб гісторыі Вялікай Айчыннай вайны, таму што мае сваякі не ўдзельнічалі ў ёй, але я пачуў ужо, што людзі тут здзяйснялі шмат гераічных учынкаў. Асабліва шмат аб гэтым расказалі на рэканструкцыі, таму што тут па крупінках аднаўлялі падзеі мінулага», — адзначыў Максім Дэкамбен.
Праект «Поезд Памяці», ініцыяваны кіраўнікамі Савета Рэспублікі і Савета Федэрацыі парламентаў Беларусі і Расіі, упершыню рэалізаваны ў 2022 годзе. У 2025 годзе ў ім прынялі ўдзел хлопцы і дзяўчаты з 15 краін. 
