Егіпет з 1 жніўня пераходзіць на лічбавыя візы. Як быць беларускім турыстам?
Фота istockphoto.com 22 ліпеня, Мінск . З 1 жніўня Егіпет запускае сістэму лічбавых віз. Як быць беларускім турыстам, расказалі БЕЛТА ў Рэспубліканскім саюзе турыстычных арганізацый.
«Замест папяровых наклеек у пашпарце турысты будуць атрымліваць QR-код. На першым этапе новаўвядзенне пачне працаваць у аэрапорце Каіра, затым сістэму ўвядуць у дзеянне ў іншых аэрапортах. Кошт візы застанецца ранейшы – $30», – растлумачылі ў РСТА.
Як мяркуюць тураператары, турысты, якія прыбываюць у жніўні ў Хургаду, будуць афармляць візы па старых правілах. Поўнамаштабнае ўкараненне пачнецца толькі пасля апрабоўвання сістэмы ў Каіры.
Атрымаць QR-код можна будзе адным з трох спосабаў: праз афіцыйны сайт, праз мабільны дадатак, праз аўтаматы самаабслугоўвання ў залах прылёту.
Пасля запаўнення анкеты і аплаты карткай турыст атрымае QR-код, які трэба будзе прад’явіць на пашпартным кантролі. Аплата наяўнымі не прымаецца, толькі банкаўскай карткай.
Як паведамляюць мясцовыя ўлады, запуск абноўленай сістэмы электронных віз з выкарыстаннем QR-кодаў стане ключавой вяхой. Новаўвядзенне дасць магчымасць поўнасцю ліквідаваць затрымкі на пагранічным кантролі, таму што турыстам больш не давядзецца траціць час на запаўненне папяровых бланкаў і куплю марак-наклеек у вокнах аэрапортаў — усе працэдуры пераходзяць у бескантактны анлайн-фармат.
Турыстычныя кампаніі змогуць аформіць QR-код ад імя турыста загадзя, за 48 гадзін да прыбыцця.
Правілы ўезду для турыстаў, якія прыбываюць у Шарм-эль-Шэйх, пакуль не мяняюцца. Калі турыст прылятае на гэты курорт, не пакідае тэрыторыю Паўднёвага Сіная і знаходзіцца там не больш за 15 дзён, яму па-ранейшаму бясплатна ставяць у пашпарт так званы «сінайскі штамп». Лічбавая сістэма на яго распаўсюджвацца не будзе.
«Калі ж турыст плануе правесці ў Шарм-эль-Шэйху больш за 15 дзён, выязджаць за межы Паўднёвага Сіная або прылятае ў Хургаду, Каір або іншыя аэрапорты Егіпта, неабходна аформіць турыстычную візу — цяпер ужо ў лічбавым фармаце», — дадалі ў РСТА.
