Чацвёртая сесія Палаты прадстаўнікоў адкрыецца 15 верасня
8 ліпеня, Мінск . Чацвёртая сесія Палаты прадстаўнікоў Нацыянальнага сходу Беларусі восьмага склікання адкрыецца 15 верасня, паведаміў старшыня Палаты прадстаўнікоў Ігар Сергяенка ў час пасяджэння Савета Палаты прадстаўнікоў,
Прыкладны графік падрыхтоўкі пытанняў для разгляду на чацвёртай сесіі Палаты прадстаўнікоў разгледжаны сёння ў ліку іншых пытанняў на пасяджэнні Савета.
«Пасяджэнне ў адпаведнасці з Канстытуцыяй праводзіцца ў трэці аўторак верасня, таму 15 верасня адкрыецца чацвёртая сесія», — сказаў Ігар Сергяенка.
Гаворачы аб заканадаўчай дзейнасці, старшыня Палаты прадстаўнікоў адзначыў, што ў перыяд трэцяй сесіі праведзена даволі актыўная, плённая работа. Прынята 78 законапраектаў, значная частка з якіх датычыцца пытанняў міжнароднай дзейнасці. Размова ідзе аб ратыфікацыі падпісаных пагадненняў па розных напрамках з больш як дзясяткам краін.
Адносна падрыхтоўкі законапраектаў на чацвёртую сесію Ігар Сергяенка ўказаў, што ў рабоце некалькі праектаў законаў, якія ў першую чаргу датычацца эканомікі. У рабоце блок законапраектаў, звязаных з сельскай гаспадаркай. Будуць разглядацца пытанні крэдытна-фінансавай сферы, прамысловай бяспекі.
«Мы чакаем у бліжэйшы час унясення і іншых праектаў законаў, якія датычацца ліцэнзавання, аховы працы, працоўных адносін, геральдыкі, дзяржаўных узнагарод. Таксама рыхтуецца шэраг заканадаўчых ініцыятыў у Палаце прадстаўнікоў», — сказаў Ігар Сергяенка.
У адпаведнасці з планам, зацверджаным кіраўніком дзяржавы на 2026 год, павінна быць унесена канцэпцыя праекта закона аб валанцёрскай дзейнасці.
Спікер адзначыў, што падпісаны план работы на другое паўгоддзе, у які ўключана больш за 50 практыка-арыентаваных мерапрыемстваў: семінараў, выязных пасяджэнняў Савета Палаты прадстаўнікоў, выязных пасяджэнняў камісій, круглых сталоў і інш.
«Большасць гэтых мерапрыемстваў звязана з тымі законапраектамі, якія цяпер знаходзяцца ў стадыі падрыхтоўкі да другога чытання. Частка з іх чакаецца ў бліжэйшы час», — дадаў Ігар Сергяенка.
Фота Андрэя Сіняўскага
