БУТБ і Расійскі экспартны цэнтр плануюць стварыць «адно акно» для выхаду на беларускі рынак
Фота з архіва 29 верасня, Мінск . Беларуская ўніверсальная таварная біржа і Расійскі экспартны цэнтр (РЭЦ) вызначылі пералік магістральных напрамкаў узаемадзеяння, паведамілі ў прэс-службе БУТБ.
Чакаецца, што глыбокая прапрацоўка гэтых магістральных напрамкаў дасць магчымасць ужо ў бліжэйшай перспектыве вывесці супрацоўніцтва паміж бакамі на якасна новы ўзровень. У прыватнасці, разглядаецца магчымасць бясшвовай інтэграцыі сэрвісаў БУТБ і РЭЦ з мэтай стварэння «аднаго акна» для расійскага бізнесу, зацікаўленага ў выхадзе на рынак Беларусі. Гэта пытанне абмяркоўвалася ў ходзе сустрэчы старшыні праўлення БУТБ Аляксандра Асмалоўскага з намеснікам генеральнага дырэктара РЭЦ Таццянай Ан і кіраўніком прадстаўніцтва РЭЦ у Беларусі Віктарам Даранкевічам.
«Нам трэба сфарміраваць комплексную паслугу для бізнесу, каб акрэдытаваная на біржы расійская кампанія адначасова атрымлівала доступ і да біржавых таргоў, і да ўсяго спектра мер фінансавай і нефінансавай падтрымкі, якія прадастаўляюцца РЭЦ. Аналагічна праз сайт РЭЦ будзе арганізаваны бясшвовы пераход на пляцоўку біржы, дзе можна будзе скарыстацца яе лічбавай інфраструктурай і інструментарыем. Такая інтэграцыя нашых сэрвісаў істотна спросціць работу ў Беларусі для расійскіх таваравытворцаў — у першую чаргу суб’ектаў малога і сярэдняга прадпрымальніцтва», — упэўнена Таццяна Ан.
Старшыня праўлення БУТБ Аляксандр Асмалоўскі згадзіўся з меркаваннем расійскага боку аб неабходнасці далейшага паглыблення супрацоўніцтва і ў дапаўненне да ўжо агучаных напрамкаў прапанаваў наладзіць сістэмную работу па павышэнні актыўнасці расійскіх прадпрыемстваў на біржавой платформе. «Мы зацікаўлены ў пашырэнні прысутнасці расійскіх вытворцаў на біржавых таргах і гатовы прадаставіць РЭЦ падрабязную інфармацыю аб прадукцыі, запатрабаванай у Беларусі, з мэтай прыцягнення яе вытворцаў на нашу электронную пляцоўку. Гэта дасць магчымасць сканцэнтраваць намаганні РЭЦ на канкрэтных таварных нішах і кропкава накіроўваць на біржу прадпрыемствы з адпаведных галін. У выніку не толькі павялічыцца колькасць расійскіх кліентаў біржы, але і павысіцца ўзровень іх актыўнасці на таргах», — адзначыў кіраўнік БУТБ.
Для складання дэталёвай дарожнай карты супрацоўніцтва БУТБ і РЭЦ у новым фармаце плануецца стварыць рабочую групу са спецыялістаў абедзвюх арганізацый. Менавіта гэта структура будзе займацца практычнай рэалізацыяй дамоўленасцей, дасягнутых паміж бакамі.
ААТ «Беларуская ўніверсальная таварная біржа» створана ў 2004 годзе. Першыя таргі адбыліся ў чэрвені 2005 года. БУТБ — адна з буйнейшых таварных біржаў ва Усходняй Еўропе. Яе галоўная функцыя — садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
