Багіраў: Беларусь — важны ўдзельнік усіх працэсаў у ААН на глабальным і рэгіянальным узроўнях
Расул Багіраў 23 кастрычніка, Мінск . Беларусь з’яўляецца важным і актыўным удзельнікам усіх працэсаў у ААН, якія адбываюцца на глабальным і рэгіянальным узроўнях. Такі пункт гледжання выказаў пастаянны каардынатар ААН у Беларусі Расул Багіраў у час выступлення ў беларускім знешнепалітычным ведамстве на мерапрыемстве напярэдадні Дня Арганізацыі Аб’яднаных Нацый, які адзначаецца 24 кастрычніка,
Расул Багіраў падкрэсліў ролю Беларусі як аднаго з заснавальнікаў ААН і адзначыў, што цяпер перад арганізацыяй стаіць шмат задач. Ён звярнуў увагу на важнасць таго, што маладое пакаленне павінна больш даведвацца пра дзейнасць ААН, пра тое, што адбываецца ў свеце, а таксама пераймаць эстафету тых прынцыпаў, якімі кіруецца арганізацыя. «Цяпер перыяд напярэдадні выбараў новага Генеральнага сакратара ААН», — звярнуў увагу Расул Багіраў.
Мерапрыемства прайшло ў Міністэрстве замежных спраў у інтэрактыўным фармаце пад кіраўніцтвам кіраўніка беларускага знешнепалітычнага ведамства Максіма Рыжанкова. З удзелам студэнтаў факультэта міжнародных адносін Беларускага дзяржаўнага ўніверсітэта, ветэранаў беларускай дыпламатычнай службы ў інтэрактыўнай форме было змадэлявана пасяджэнне Генеральнай Асамблеі ААН па выбарах кандыдатуры на пасаду Генеральнага сакратара арганізацыі.
Максім Рыжанкоў падкрэсліў, што гэты фармат мерапрыемства дае магчымасць па-новаму зірнуць на дзейнасць такой структуры.

Па выніках сустрэчы міністр сказаў журналістам, што такія сустрэчы дапамагаюць моладзі паказаць рэаліі знешняй палітыкі, каб яны не проста збоку глядзелі на працэсы, якія адбываюцца, напрыклад, у ААН, а маглі прымераць на сябе розныя амплуа. «Цяпер сур’ёзныя дэбаты вядуцца ў ААН наконт выбару новага Генеральнага сакратара, гэта няпростая работа», — падкрэсліў кіраўнік ведамства. Максім Рыжанкоў сказаў, што МЗС прадоўжыць праводзіць такія мерапрыемствы, накіраваныя на падрыхтоўку маладых кадраў.
Ён таксама адказаў на пытанні журналістаў адносна прынцыпаў дзейнасці ААН, закладзеных у час яе стварэння ў 1945 годзе, пасля Другой сусветнай вайны. «На працягу доўгага часу Статут ААН успрымаўся ўсімі як самы галоўны і самы важны дакумент, які рэгулюе міжнародныя адносіны», — заўважыў міністр.
Пры гэтым ён канстатаваў, што, на жаль, з часам у сістэме ААН адбылася практычная трансфармацыя, калі рашэнні ўсё больш сталі палітызавацца асобнымі дзяржавамі за кошт інтарэсаў іншых. «І сёння мы бачым, што ўсе тыя закладзеныя пастулаты ААН сёння прабуксоўваюць, таму што не даюць магчымасці актыўна ўдзельнічаць у вырашэнні ўсіх выклікаў і асноўных праблем сучаснасці», — выказаў меркаванне міністр. Паводле яго слоў, напрыклад, пытанні правоў чалавека сёння адвольна трактуюцца супраць якіх-небудзь дзяржаў, якія з пункту гледжання Захаду вядуць незалежную палітыку, нават не звязаную з правамі чалавека, а проста якія не ўпісваюцца ў алгарытм эканамічнага або палітычнага развіцця, што выбудоўваецца заходнім светам.
Кіраўнік МЗС звярнуў увагу на неабходнасць рэфармавання сістэмы ААН.
Фота Сяргея Шэлега






