Беларускія ваенныя праходзяць дастатковую падрыхтоўку для выканання задач па абароне дзяржавы — дэпутат
Фота «Ваяр» 28 чэрвеня, Мінск . Беларускія ваенныя праходзяць дастатковую падрыхтоўку для выканання задач па абароне дзяржавы. Такую думку выказаў член Пастаяннай камісіі па нацыянальнай бяспецы Палаты прадстаўнікоў Нацыянальнага сходу Беларусі Руслан Шкодзін у эфіры праграмы «Рэцэпт сапраўднага беларуса» на тэлеканале «РТР-Беларусь», .
Паводле слоў Руслана Шкодзіна, беларуская армія прайшла шлях станаўлення і развіцця. «Цяпер ідзе этап удасканалення беларускай арміі. На гэты момант Узброеныя Сілы Рэспублікі Беларусь знаходзяцца ў боегатоўным стане. Яны добра аснашчаны. Асабовы склад праходзіць дастатковую падрыхтоўку, каб выконваць задачы па абароне дзяржавы», — падкрэсліў ён.
Дэпутат зрабіў акцэнт: заўсёды ёсць і будзе над чым працаваць далей. «У прынцыпе, гэта работа ніколі не спыняецца. Сёння мы дасягнулі аднаго рубяжа, а далей узніклі новыя ўмовы. Дапусцім, хто 10-15 гадоў таму мог прадказаць, што такая цацка, як квадракоптар, будзе сёння з’яўляцца вельмі сур’ёзнай баявой зброяй, супраць якой, па сутнасці, у свеце ніхто не прыдумаў стопрацэнтнага процідзеяння?» — звярнуў увагу Руслан Шкодзін.
Таксама ён на вельмі простым прыкладзе растлумачыў, навошта маладым людзям ісці ў армію. «Заўсёды пытаюся так: што для цябе Радзіма? Любы чалавек скажа, што ў першую чаргу гэта маці і бацька, дом, двор, дзе вырас, вёска, горад. Гэта людзі асацыююць з малой радзімай», — расказаў дэпутат. Ён дадаў, што ў кожнага з нас ёсць месцы, дарагія сэрцу. «Той любімы двор, вулачка, па якой бацька вучыў на веласіпедзе катацца, магазінчык, у які хадзіў з мамай па марожанае, дарога, па якой ішоў у школу, парк, дзе гуляў і катаўся на арэлях. Гэта ж для цябе дорага? А хто гэта ўсё зрабіў? Гэта зрабілі нашы людзі пад кіраўніцтвам нашых жа людзей, якія знаходзяцца ва ўладзе, — адзначыў Руслан Шкодзін. — Будзем абараняць беларускі народ, саміх сябе, хто стварыў усю гэту прыгажосць, тое, што ты любіш».
