«Беларусь — сапраўдная мара». В’етнамскія артысты ўпершыню выступілі на сцэне Вялікага тэатра
Фота прэс-службы Вялікага тэатра 12 чэрвеня, Мінск . У Вялікім тэатры Беларусі ў час фестывалю «Балетнае лета» адбыўся гала-канцэрт «Шаўковая нітка» — сумесны праект з В’етнамскім аркестрам традыцыйных інструментаў опернага тэатра «Хо Гыом»,
Генеральны дырэктар Вялікага тэатра Кацярына Дулава адзначыла важнасць гэтай падзеі. «У маі ў нас была магчымасць паказаць наша балетнае і опернае майстэрства ў В’етнаме. Сёння мы прымаем візіт у адказ цудоўнага калектыву, які прыўнясе новую нотку ў наша ўзаемадзеянне і ў жыццё Вялікага тэатра», — сказала яна.
Дырэктар таксама нагадала, што ў час гастроляў у В’етнаме Вялікі тэатр Беларусі і оперны тэатр «Хо Гыом» падпісалі мемарандум аб супрацоўніцтве на бліжэйшыя пяць гадоў. Паводле слоў Кацярыны Дулавай, у наступным годзе беларускі бок плануе адправіць у В’етнам балеты «Жызэль» і «Папялушка», а ўжо ў Мінску в’етнамскія артысты прадэманструюць сваё майстэрства сумесна з беларускім сімфанічным аркестрам.
«Упершыню артысты Вялікага тэатра Беларусі выступілі ў В’етнаме, і іх праграма, канцэрты зрабілі на нас незабыўнае ўражанне, — адзначыў дырэктар опернага тэатра «Хо Гыом» народны артыст В’етнама Нгуен Конг Бай. — Мы былі ўражаны выбранымі творамі, якія ідэальна адпавядаюць эстэтыцы і густам нашага народа». Паводле яго слоў, паміж тэатрамі плануецца ўсебаковае супрацоўніцтва, далейшыя гастролі адзін у аднаго і сумесныя выступленні ў адной праграме.
Нгуен Конг Бай растлумачыў, што ў аўтараў «Шаўковай ніткі» была мэта стварыць мастацкае палатно, дзе традыцыйныя музычныя інструменты В’етнама гарманічна спалучаюцца з акадэмічнай музыкай Беларусі. Дзякуючы канцэрту гледачы змаглі далучыцца да культуры краіны, зразумець яе эстэтыку, а гэта садзейнічае збліжэнню народаў.
Заслужаны артыст В’етнама музыкант Тат Нгіа ўпершыню ў Беларусі. Паводле яго слоў, першае, што кідаецца ў вочы, — прыгажосць Мінска, яго цывілізаванасць і спакой. «Людзі тут вельмі добразычлівыя і шчаслівыя, я проста ў захапленні ад гэтага горада. Мы паспелі наведаць плошчу Незалежнасці і Траецкае прадмесце. Усё гэта зрабіла на мяне ўражанне», — падзяліўся ён.
Оперная спявачка Даа То Лоан дадала, што для яе Беларусь увасабляе сапраўдную мару. Найбольшае ўражанне на яе зрабіў Вялікі тэатр. «Я заўсёды марыла аб тым, каб выступіць тут. Стаяць на сцэне Вялікага тэатра Беларусі як оперная спявачка з В’етнама — вялізнае шчасце. Я з вялікім задавальненнем праспявала для беларускіх гледачоў», — сказала яна.
