Беларусь прэзентуе галіновую прадукцыю на Mining and Metals Central Asia ў Алматы
Фота «Белінтэрэкспа» 16 верасня, Мінск . Айчынныя ўзоры, тэхналагічныя рашэнні і галіновыя прапановы прадстаўлены на 31-й Цэнтральна-Азіяцкай міжнароднай выстаўцы «Горнае абсталяванне, здабыча і абагачэнне руд і мінералаў» Mining and Metals Central Asia 2026, якая праходзіць з 16 па 18 верасня ў Алматы (Казахстан). Аб гэтым паведамілі ў «Белінтэрэкспа» Беларускай гандлёва-прамысловай палаты.
Mining and Metals Central Asia штогод збірае сотні кампаній і тысячы наведвальнікаў — вытворцаў і пастаўшчыкоў абсталявання, прадстаўнікоў горна-металургічных холдынгаў, навуковых колаў. За гады правядзення выстаўка стала аўтарытэтнай галіновай бізнес-платформай міжнароднага ўзроўню для вырашэння актуальных задач, якія стаяць перад горна-металургічным комплексам рэгіёна. Сярод удзельнікаў міжнароднай выстаўкі — флагман айчыннага машынабудавання «БЕЛАЗ-ХОЛДЫНГ».
У гэтым годзе выстаўка аб’яднала прадстаўнікоў з 28 краін, у тым ліку Аўстрыі, Аўстраліі, Бельгіі, Вялікабрытаніі, Германіі, Канады, Кіпра, Індыі, Ірана, ААЭ, Расіі, ЗША, Францыі, Турцыі. На пляцоўцы Mining and Metals Central Asia 2026 прадстаўлены тэхніка, абсталяванне і тэхналогіі для горназдабыўных вытворчасцей, горна-абагачальных камбінатаў, рашэнні для забеспячэння бяспекі горных работ, лічбавізацыі, аўтаматызацыі. У выстаўцы прымаюць удзел больш як 500 галіновых экспанентаў і звыш 4 тыс. прафесійных баераў, што дае магчымасць эфектыўна арганізаваць шэраг дзелавых сесій, B2B-перагавораў з удзелам прадстаўнікоў беларускіх і рэгіянальных кампаній, зацікаўленых у пастаўках новай тэхнікі і абсталявання, паслуг і сучасных тэхналагічных рашэнняў у галіне.
Пры ўдзеле генеральнага консула Беларусі ў Алматы Дзяніса Мелешкіна адбыліся кансультацыі і дзелавыя сустрэчы з экспанентамі. Аператарам беларускай экспазіцыі выступае ўнітарнае прадпрыемства «Белінтэрэкспа» Беларускай гандлёва-прамысловай палаты.
