Мінэканомікі адзначае рост колькасці вытворчых інвестпраектаў у рэгіёнах
Фота з архіва 19 кастрычніка, Мінск . Міністр эканомікі Юрый Чабатар адзначыў рост колькасці вытворчых інвестпраектаў у рэгіёнах і назваў ключавыя ўмовы поспеху. Аб гэтым ішла размова ў час яго паездкі ў Асіповіцкі раён, паведамілі ў прэс-службе Мінэканомікі.
Старт праграмы дня — у ААТ «Асіповіцкі завод аўтамабільных агрэгатаў». Кіраўнік Мінэканомікі сустрэўся з працоўным калектывам і абмеркаваў актуальныя для работнікаў пытанні. Прадпрыемства — прыклад паступальнага развіцця: у 2025 годзе тут завяршылі мадэрнізацыю магутнасцей, а цяпер рэалізуюць інтэграцыйны праект па стварэнні вытворчасці дакладнага алюмініевага ліцця. Юрый Чабатар азнаёміўся з ходам работ па праекце.
Міністр адзначыў, што створанае дзяржавай камфортнае інстытуцыянальнае асяроддзе — база для прыцягнення інвестыцый, але ключавой умовай поспеху з’яўляецца якасная прапрацоўка праекта. «Каб прыцягнуць капітал, недастаткова перспектыўнай ідэі — патрэбны правільны бізнес-план, у якім дакладна ўвязаны крыніцы сыравіны, кампетэнцыі, абсталяванне і рынкі збыту, вызначаны рэалістычныя тэрміны акупнасці. Пад дэталёва прапрацаваныя ініцыятывы дзяржава прадастаўляе рэсурсы на выгадных умовах. У Асіповіцкім раёне ў 2009 годзе рэалізуецца шэсць праектаў, але патэнцыял рэгіёна дазваляе павялічыць іх колькасць», — сказаў кіраўнік ведамства.
Юрый Чабатар таксама наведаў парфумерна-касметычную фабрыку «Сонца». Тут дзякуючы «Рэгіянальнай ініцыятыве» запусцілі новую вытворчасць капсул для мыцця ў пасудамыечных машынах. Пачата рэалізацыя праекта па ўзвядзенні аўтаматычнай сістэмы фарміравання групавой упакоўкі і рабатызаванага комплексу ўкладкі палет.
Міністр акцэнтаваў увагу на тым, што аўтаматызацыя і рабатызацыя тэхналагічных аперацый у звязцы з укараненнем інструментаў беражлівай вытворчасці — важнейшыя рэзервы росту прадукцыйнасці працы і павышэння канкурэнтаздольнасці. «Мы мэтанакіравана падтрымліваем такія бізнес-ідэі. З пачатку года дзейнічае крэдытны прадукт «Тэхналагічная самадастатковасць», ужо 11 праектаў з Магілёўскай вобласці сталі яго ўдзельнікамі», — адзначыў Юрый Чабатар.-0
Фота Мінэканомікі
