Ад машынабудавання і АПК да медыцыны і ШІ. Хань Чжэн агучыў прапановы па супрацоўніцтве з Беларуссю
6 чэрвеня, Мінск . Намеснік старшыні КНР Хань Чжэн агучыў шэраг прапаноў па развіцці супрацоўніцтва з Беларуссю ў час Беларуска-кітайскага форуму прамысловага і інвестыцыйнага супрацоўніцтва «Прамысловая кааперацыя — шлях да сумеснага развіцця»,
У ліку перспектыўных напрамкаў ён назваў сельскую гаспадарку, машынабудаванне, медыцыну, лічбавізацыю, штучны інтэлект, новыя матэрыялы. «Гатовы павялічваць гандаль сельгаставарамі і машынабудаўнічай прадукцыяй, пашыраць прамысловае і інвестыцыйнае супрацоўніцтва. Ва ўмовах высокай узаемадапаўняльнасці прамысловых сістэм нашых краін адкрываюцца шырокія перспектывы для ўзаемадзеяння ў галіне прамкааперацыі», — сказаў ён.
«Беларусь і Кітай — сапраўдныя сябры і добрыя партнёры. Адносіны паміж краінамі захоўваюць высокую дынаміку. Наша гандлёва-эканамічнае і інвестыцыйнае супрацоўніцтва мае плённы і дынамічны характар», — адзначыў намеснік старшыні КНР.
Растуць аб’ёмы ўзаемнага гандлю, эфектыўна працуе Кітайска-беларускі індустрыяльны парк «Вялікі камень».
«На фоне тэктанічных зрухаў у вельмі турбулентным свеце Кітай гатовы і далей выбудоўваць адносіны з беларускімі калегамі ў духу шчырасці і ўзаемнага даверу і няўхільна рэалізоўваць важныя дамоўленасці лідараў дзвюх краін. Спадзяюся на яшчэ больш дынамічнае развіццё ўсебаковага і ўсепагоднага стратэгічнага партнёрства на карысць нашых народаў», — рэзюмаваў Хань Чжэн. 
Фота Максіма Гучака
