Ад краіны з тысячагадовай культурнай гісторыяй: выстава таджыкскіх мастакоў адкрылася ў НББ
Фота Міністэрства культуры 27 красавіка, Мінск . У Нацыянальнай бібліятэцы Беларусі адкрылася выстава таджыкскіх мастакоў «Прыгажосць Таджыкістана: спадчына для будучыні» ў час Дзён культуры Рэспублікі Таджыкістан у Рэспубліцы Беларусь,
У экспазіцыю ўвайшло 38 карцін, іх тэматычная накіраванасць — абстракцыя, нацыянальныя матывы і каларыт, творы сучаснага мастацтва Таджыкістана.
Міністр культуры Беларусі Марат Маркаў сказаў, што экспазіцыя — эксклюзіў для гасцей, паколькі Дні культуры Таджыкістана адкрываюцца толькі заўтра. «Але ўжо сёння гэта першае мерапрыемства ў рамках Дзён культуры. Мы сёння (з прадстаўнікамі Таджыкістана. — Заўвага БЕЛТА) абмяркоўвалі многія пытанні і нашы далейшыя крокі (супрацоўніцтва. — Заўвага БЕЛТА). Упэўнены, гэта выстава далёка не апошняя і мы яшчэ намецім сур’ёзны план, у рамках якога ў многіх не раз з’явіцца магчымасць пазнаёміцца з культурай гэтай цудоўнай краіны», — адзначыў міністр.
Марат Маркаў таксама палічыў сімвалічным, што выстава праходзіць у год дзвюх знамянальных дат — 20-годдзя Нацыянальнай бібліятэкі і 85 гадоў з пачатку Вялікай Айчыннай вайны. «Мы, беларусы, вельмі беражліва ставімся да гэтай падзеі, і я ведаю дакладна, што гэта каштоўнасць нас з таджыкскім народам аб’ядноўвае. Вельмі многія таджыкі прымалі ўдзел у вызваленні Беларусі. Іх імёны мы ведаем, яны адзначаны ў нашай гісторыі», — нагадаў ён.
Міністр культуры Таджыкістана Матлубахон Сатарыён падзякавала за магчымасць размяшчэння экспазіцыі ў такім значным месцы. «Радасна і сімвалічна, што менавіта тут, у гэтым храме мастацтваў, дзе стагоддзямі фарміраваліся традыцыі мастацкага майстэрства і духоўнай пераемнасці, мы прадстаўляем гледачу яркі, жывы і сапраўдны вобраз сучаснага Таджыкістана. Несумненна, імкліваму развіццю культурных сувязей паміж нашымі краінамі садзейнічае адкрытая і дружалюбная палітыка лідараў дзяржаў. Дзякуючы іх асабістай дружбе і палітычнай волі ўзаемадзеянне Беларусі і Таджыкістана плённа развіваецца не толькі ў сферы культуры, але і ў іншых галінах», — падкрэсліла Матлубахон Сатарыён. 
Яна таксама абазначыла, чым унікальная культура дзяржавы. «Таджыкістан — краіна з тысячагадовай культурнай гісторыяй. Мы ганарымся сваімі паэтамі, філосафамі, майстрамі прыкладнога і выяўленчага мастацтва, чыя спадчына займае дастойнае месца ў скарбніцы сусветнай цывілізацыі. Мастацтва Таджыкістана — мост паміж мінулым і будучым, усходам і захадам, традыцыямі і сучаснасцю. На выставе прадстаўлены творы жывапісу і графікі, нацюрморты і пейзажы, яны натхнёныя жыццём і побытам таджыкскага народа. Работы прасякнуты павагай да прыроды, любоўю да роднай зямлі і глыбокай увагай да дэталей штодзённага жыцця. Прадстаўлены творы як прызнаных майстроў таджыкскага жывапісу, так і маладых талентаў, чые работы сведчаць аб пераемнасці традыцый і яркай будучыні таджыкскага выяўленчага мастацтва», — дадала міністр.
У падарунак беларускаму боку Матлубахон Сатарыён уручыла карціну народнага мастака Рэспублікі Таджыкістан Фаруха Негматзадэ. «Яго работы выстаўлены ў 110 музеях свету, ён з вялікім задавальненнем перадаў вам гэты падарунак», — адзначыла яна. 
