Ад яркіх юбілеяў да «International voice in Vitebsk». Галоўныя падзеі «Славянскага базару — 2017»
6 ліпеня, Мінск . Да XXXV Міжнароднага фестывалю мастацтваў «Славянскі базар у Віцебску» застаецца 10 дзён. БЕЛТА прапануе акунуцца ў рэтраспектыву: штодзённа ў архіўных матэрыялах расказваем пра самыя яркія моманты мерапрыемства па гадах. Сёння — пра фестываль 2017 года.
XXVI «Славянскі базар» прайшоў з 13 па 17 ліпеня, дадатковыя мерапрыемствы адбыліся з 10 па 12 і 18-19 ліпеня.
Перад афіцыйным стартам фестывалю Летні амфітэатр стаў пляцоўкай для шэрага сольных і зборных канцэртаў. Заслужаная артыстка Расіі Зара выканала песні ў суправаджэнні Прэзідэнцкага аркестра Беларусі пад кіраўніцтвам Віктара Бабарыкіна, а на наступны дзень адбылося выступленне заслужанага артыста Расіі Рыгора Лепса. У дзень адкрыцця быў узняты фестывальны сцяг і сцягі 36 краін свету. 
На Плошчы лаўрэатаў запалілася зорка народнай артысткі Грузіі і Расіі Тамары Гвердцытэлі, якая была ўдастоена спецыяльнай узнагароды Прэзідэнта Беларусі «Праз мастацтва — да міру і ўзаемаразумення». 
«Славянскі базар — 2017» запомніўся чарадой юбілейных праграм. У рамках Дзён Саюзнай дзяржавы выступіў ансамбль «Сябры», поўную залу амфітэатра сабраў і кампазітар Аляксандр Зацэпін, які прадставіў канцэрт «Ёсць толькі імгненне…» у суправаджэнні Нацыянальнага акадэмічнага канцэртнага аркестра Беларусі пад кіраўніцтвам Міхаіла Фінберга. Група «Рукі ўверх!» таксама адзначыла на фестывалі сваё 20-годдзе. У канцэрце-прысвячэнні Аляксандру Ціхановічу «У дзень нараджэння артыста» прынялі ўдзел зоркі беларускай і замежнай эстрады. 
Фінал XXVI Міжнароднага конкурсу выканаўцаў эстраднай песні «Віцебск» праходзіў тры дні. У тым годзе Гран-пры не быў уручаны з-за аднолькавых балаў ва ўладальнікаў першай і другой прэмій. Па выніках дадатковага галасавання журы першую прэмію атрымаў выканаўца з Украіны, другую — беларус, які таксама быў удастоены спецыяльнай узнагароды імя Уладзіміра Мулявіна «За лепшае ўвасабленне нацыянальнай тэмы, высокае выканальніцкае майстэрства». Трэцяя прэмія адправілася ў Сербію, а спецыяльны прыз кіраўніка дзяржавы «Славянская надзея» дастаўся прадстаўніцы Харватыі.
XV Міжнародны дзіцячы музычны конкурс традыцыйна адбыўся ў канцэртнай зале «Віцебск», дзе ўладальніцай Гран-пры стала беларуская спявачка Марыя Магільная. Спецыяльнымі прызамі Парламенцкага сходу Саюза Беларусі і Расіі былі ўзнагароджаны Марыя Магільная і расіянка Кацярына Крэтава.
Гала-канцэрт «International voice in Vitebsk» сабраў на адной сцэне прадстаўнікоў каля дзясятка краін. Дэбютам на фестывалі стала выступленне ўдзельнікаў сатырычнага шоу «Аднойчы ў Расіі». Акрамя таго, у Летнім амфітэатры прайшоў канцэрт «Вітае Украіна». У рамках праекта «Фестываль без межаў», тэатральная сцэна прыняла канцэрт майстроў мастацтваў Ізраіля, а ў Віцебскай абласной філармоніі прайшоў канцэрт італьянскіх майстроў мастацтваў.
ІІІ фэст вулічнага мастацтва «На сямі вятрах» адкрыўся парадам — прэзентацыяй удзельнікаў. Былі прадстаўлены інтэрактыўныя праекты вулічных тэатраў, музыкантаў, лялечных тэатраў.
На «Славянскім базары — 2017» прэзентавалі праект «Фармат» Беларускага саюза мастакоў. «Тэатральныя сустрэчы» прапанавалі віцебскаму гледачу самыя разнастайныя праграмы: у канцэртнай зале «Віцебск» адбыліся паказы трох спектакляў, а ў Нацыянальным акадэмічным драматычным тэатры імя Якуба Коласа жадаючыя змаглі атрымаць задавальненне ад сямі пастановак на любы густ.
Урачыстае закрыццё XXVI Міжнароднага фестывалю мастацтваў «Славянскі базар у Віцебску» адбылося 17 ліпеня ў Летнім амфітэатры. Галоўнай падзеяй дня стаў гала-канцэрт, на якім выступілі хэдлайнеры, вядомыя выканаўцы і калектывы краін-удзельніц. Таксама адбылося ўзнагароджанне лаўрэатаў Міжнароднага конкурсу выканаўцаў эстраднай песні «Віцебск» і ўладальнікаў спецыяльных прызоў.
Асноўныя мерапрыемствы XXXV Міжнароднага фестывалю мастацтваў «Славянскі базар у Віцебску» пройдуць з 16 па 19 ліпеня, а першыя канцэрты адбудуцца ўжо 14 ліпеня.
