Амаль тысячагадовую гісторыю Мінска ажывілі рэканструктары з Беларусі, Расіі і Кітая
12 верасня, Мінск . У зялёнай зоне на скрыжаванні пр.Пераможцаў і пр.Машэрава ў сталіцы праходзіць міжнародны фестываль гістарычнай рэканструкцыі «Мінск старажытны»,
Як адзначыў мастацкі кіраўнік фестывалю Ігар Усенка, удзел у ім прымаюць больш за 500 рэканструктараў з Беларусі, Расіі і Кітая.
«Усе рэканструктары жывуць у сваёй эпосе, каб максімальна перадаць яе дух, яе асаблівасці. Яны падрыхтавалі рэплікі адзення, амуніцыі, тэхнікі — усё для таго, каб прыцягнуць гледачоў і расказаць аб прадмеце сваёй цікавасці. Таму можна сказаць, што ў такія моманты гісторыя ў літаральным сэнсе ажывае. Праводзіцца фестываль з 2015 года, і з кожным годам пашыраецца як за кошт удзельнікаў, так і гледачоў», — расказаў Ігар Усенка. 
На фестывалі рэканструктары адновяць эпізоды з дзесяці стагоддзяў Мінска — ад яго першага згадвання ў летапісе 1067 года да Вялікай Айчыннай вайны. Прычым у тыя далёкія часы гледачы змогуць акунуцца, убачыўшы асобныя сцэны рэканструкцый, гарачых рыцарскіх баталій, заездаў коннікаў, а таксама стаўшы ўдзельнікам дзеяння, страляючы з лука, прымяраючы на сябе даспехі, паўтараючы рухі танцаў. Менавіта з гэтай прычыны на фестывалі цікава не толькі дарослым аматарам гісторыі, але і дзецям.
Дарэчы, асобны від экскурсу ў тую ці іншую эпоху — размова з прадстаўнікамі клубаў рэстаўратараў. Так, Алёна Мур (гэта яе гістарычны псеўданім) уваходзіць у склад клуба беларускіх гусараў 1812 года. «Наша частка праграмы — гэта конная выездка. Да яе доўга рыхтаваліся, пастаянна збіраючыся на рэпетыцыі. Таксама мы дэманструем экіпіроўку гусараў, якая заслугоўвае асобнай увагі, таму што поўнасцю паўтарае арыгінальную. Гэта вельмі складаная, ювелірная работа майстроў, у першую чаргу за кошт вялікай колькасці элементаў. Касцюм пашыты з сукна, падкладка выканана з лёну, а ў якасці дэкору выкарыстаны баваўняныя шнуры, якія плятуцца ўручную. Гэта гадзіны працы некалькіх чалавек», — расказала Алёна.
Прадставілі гусары на фестывалі і ўнікальныя артэфакты таго часу. Усе яны захоўваюцца ў калекцыі клуба, якая сфарміравалася за гады яго існавання. У ёй, напрыклад, ёсць сапраўдная ташка — сумка, якую гусары заўсёды насілі з сабой. Яна пашыта з сукна, аддзелка выканана са скуры, мае латуневыя мацаванні, а ў цэнтры яе размешчаны лагатып палка. 
На фестывалі можна таксама пазнаёміцца і з такім рэдкім ваенным падраздзяленнем, як маракі гвардыі Напалеона. «У свой час гэта падраздзяленне было створана Напалеонам для ўварвання ў Вялікабрытанію. Але пасля таго, як яно не адбылося, маракі былі спісаны на бераг і прымалі ўдзел ва ўсіх кампаніях на сушы і добра сябе праявілі, у тым ліку і ў паходзе на Расію. У прыватнасці, маракі наводзілі пераправу праз Бярэзіну, будавалі масты разам з пантанёрамі: заходзілі ў ваду і трымалі апоры для мастоў. Многія пасля памерлі ад пераахаладжэння, але цаной свайго жыцця далі магчымасць пераправіцца сваім таварышам», — расказаў Дзмітрый.
Незвычайная форма маракоў, элементы побыту са зменшанай мадэллю карабля, карабельная рында — усё гэта можна паглядзець і памацаць. 
Яшчэ адна лакацыя — інтэрактыўная пляцоўка «Арчэры клаб», дзе можна паспрабаваць свае сілы ў стральбе з лука пад кіраўніцтвам вопытных спартсменаў, на рахунку якіх перамогі ў шматлікіх спаборніцтвах.
«Мы прыходзім усёй сям’ёй на фестываль не першы год ужо. Тут цікава перш за ўсё нашым дочкам, таму што для дзяцей прапануецца шмат актыўнасцей. Мяркуючы па тым, колькі тут людзей, цікавасць да мерапрыемства вялікая. Тут можна даведацца шмат новага з гісторыі, цікава правесці час і пабыць часткай свайго горада», — расказала адна з наведвальніц фестывалю Аліна.
Фота Максіма Гучака
