Конкурс «Купальская краса» і майстар-класы ад фудблогера: як працуе маладзёжная пляцоўка ў Александрыі
11 ліпеня, Александрыя . Настольныя гульні, танцпол з дыджэямі, конкурсы і кулінарныя майстар-класы — маладзёжная пляцоўка свята «Купалле» ў Александрыі аб’яднала інтэрактыўныя зоны для гасцей усіх узростаў,
На свяце «Купалле» («Александрыя збірае сяброў») маладзёжная пляцоўка працуе адразу ў некалькіх напрамках. Тут разгарнулася фотавыстава абласнога конкурсу «Купальская краса», а ўвечары адбудзецца яго вочны этап: удзельніцы ў чатырох конкурсах будуць спаборнічаць за тытул купальскай красы Магілёўшчыны.
Для актыўных гасцей свае зоны адкрылі маладыя прадпрымальнікі з Магілёва — яны паказваюць свае напрацоўкі і частуюць аўтарскімі стравамі на фудкорце. Аматары настольных гульняў могуць праводзіць час за партыяй, а меламаны — паслухаць маладых дыджэяў, якія ўжо знаёмы публіцы па вячэрняй праграме.
Тут прадстаўлены і майстар-класы. Фудблогер Уладзіслаў Малдаванаў праводзіць урок па прыгатаванні кулінарных страў для ўсіх жадаючых. А студэнты Беларускага дзяржаўнага ўніверсітэта харчовых і хімічных тэхналогій вучаць складаць аўтарскія напіткі: кожны можа сам падабраць інгрэдыенты, пакаштаваць і забраць рэцэпт з сабой.
Першы сакратар Магілёўскага абласнога камітэта ГА «БРСМ» Алег Бойка адзначыў, што пляцоўка задумана як прастора для стасункаў і адпачынку. «На нашай лакацыі ёсць гульні для любога ўзросту. Тут можна і паесці, і адпачыць — гэта прастора абсалютна для ўсіх удзельнікаў свята «Александрыя збірае сяброў». Таксама сёння на пляцоўцы пройдзе адкрыты дыялог з удзельнікамі фіналу «Уладар сяла». Будзем гаварыць аб традыцыйных сямейных каштоўнасцях, нашых культурных асаблівасцях і важнасці інстытута сям’і», — расказаў ён.
