У СД ствараюцца не проста гандлёвыя адносіны, а магутны эканамічны шчыт суверэнітэта — Качанава
Наталля Качанава 26 чэрвеня, Мінск . У Саюзнай дзяржаве выбудоўваюцца не проста ўстойлівыя гандлёвыя адносіны, а фарміруецца магутны эканамічны шчыт. Аб гэтым сказала старшыня Савета Рэспублікі Наталля Качанава на пленарным пасяджэнні XIII Форуму рэгіёнаў Беларусі і Расіі,
«Эканоміка — ужо даўно не толькі пра лічбы, вытворчасці і рынкі. Гэта пытанне суверэнітэту, здольнасці абараняць уласныя інтарэсы і права жыць па сваім выбары. У рамках Саюзнай дзяржавы мы выбудоўваем не проста ўстойлівыя гандлёвыя адносіны, а фарміруем магутны эканамічны шчыт. Проста павялічваць тавараабарот ужо недастаткова. Нам пара рухацца да іншага па якасці ўзроўню інтэграцыі. Для гэтага неабходна ствараць трансгранічны бізнес там, дзе без гэтага ў адзіночку не выжыць», — адзначыла Наталля Качанава.
Спікер пералічыла ключавыя напрамкі развіцця эканамічнага супрацоўніцтва дзвюх краін. Першым яна назвала прамысловую кааперацыю і тэхналагічны суверэнітэт. «Узровень нашай кааперацыі — уражальны сімбіёз інтэлекту, рэсурсаў і прамысловай магутнасці. Мы разам пабудавалі атамную электрастанцыю, разам узводзім сучасныя жылыя раёны, ствараем самалёты, развіваем станкабудаванне. Беларуская тэхніка глыбока інтэгравана з расійскай вытворчасцю. Так, у мінскім трактары задзейнічаны камплектуючыя амаль ад 200 расійскіх прадпрыемстваў. У Беларусі функцыянуюць каля 2,5 тыс. сумесных кампаній з расійскім капіталам, дзейнічаюць сумесныя праграмы. Цяпер вельмі важна не дубліраваць нашы магчымасці, а дапаўняць адзін аднаго, разумна злучаючы кампетэнцыі. У гэтым і заключаецца прамысловая лагістыка Саюзнай дзяржавы — трэба ствараць прадукцыю, якая будзе запатрабавана і далёка за межамі нашага саюза. Для гэтага ў нас усё ёсць — моцная прамысловая школа, магутны навуковы патэнцыял, кампетэнтныя інжынерныя кадры», — сказала старшыня Савета Рэспублікі.
Таксама неабходны роўныя ўмовы гаспадарання, устараненне бар’ераў. «Часам здараецца, што канкурэнцыя паміж нашымі кампаніямі больш жорсткая, чым з вытворцамі з трэціх краін. У ход ідуць нетарыфныя эканамічныя меры, якія часта патрэбны толькі аднаму боку. Работу па іх устараненні трэба выконваць больш сістэмна. Рабіць гэта лепш на агульнай пляцоўцы, гэта значыць ключавую ролю варта аддаць інтэграцыйным структурам і профільным рэгулятарам», — лічыць Наталля Качанава.
Нельга адставаць і ў частцы інавацыйнага развіцця. «Свет імкліва мяняецца. Выйграюць тыя краіны, якія здольны аператыўна ўкараняць новыя тэхналогіі ва ўсе сферы: ад кіравання вытворчасцю і персаналам да фарміравання ў спажыўцоў жадання купляць менавіта гэты тавар. Так, намі шмат ужо зроблена, мы разам пакараем космас, нашы вучоныя ствараюць спадарожнік са звышвысокім распазнаваннем, укараняюць тэхналогіі стваловых клетак. Але трэба рухацца не проста далей, а ахопліваць больш шырокі спектр сфер. Неабходны сумесныя рашэнні ў робататэхніцы, лічбавых тэхналогіях, мікраэлектроніцы, фармацэўтыцы, медыцынскіх распрацоўках», — дадала спікер.
Яшчэ адзін напрамак — развіццё аграпрамысловага комплексу і харчовая бяспека. «Менавіта з аграрнай тэмы пачынаўся наш першы форум у 2014 годзе. Сёння гэты напрамак не страціў сваёй актуальнасці. Хутчэй наадварот — ва ўмовах сусветнай нестабільнасці пытанне харчовай бяспекі набыло стратэгічнае значэнне. Нягледзячы на эканамічны націск, нашы краіны нарасцілі патэнцыял у вытворчасці сельскагаспадарчай прадукцыі, перапрацоўцы і пастаўках прадуктаў харчавання. Мы павінны не проста забяспечыць унутраны рынак, але і развіваць сумесныя экспартныя магчымасці, павышаць якасць прадукцыі, укараняць новыя тэхналогіі ў сельскую гаспадарку», — падкрэсліла Наталля Качанава.
Устойлівая эканоміка немагчыма без разгалінаванай сістэмы транспарту і інфраструктуры. «Неабходна пашыраць транспартныя калідоры, павышаць прапускную здольнасць маршрутаў, развіваць чыгуначныя і аўтамабільныя зносіны, ствараць зручныя ўмовы для бізнесу і грамадзян. Мы ўжо запусцілі адзіную сістэму аўтастрахавання, прыгарадныя паязды, а дзякуючы рашэнням нашых прэзідэнтаў Мінск і Маскву злучыць высокаскорасная чыгуначная магістраль. Таксама варта больш актыўна развіваць міжрэгіянальныя авіялініі паміж Беларуссю і Расіяй», — адзначыла спікер.
Важным напрамкам з’яўляецца адукацыйнае і культурнае супрацоўніцтва. «Любы праект патрабуе кадраў, ведаў, даверу, камунікацый і агульнага разумення мэт. Таму так важна развіваць супрацоўніцтва ўніверсітэтаў, навуковых арганізацый, маладзёжных аб’яднанняў, прафесійных супольнасцей. Мы ўжо фарміруем агульную адукацыйную прастору, узаемнае прызнанне дыпломаў, ствараем сумесныя даследчыя праграмы. Асаблівая ўвага — захаванню гістарычнай памяці. Наш праект «Поезд памяці» — сапраўдная школа патрыятызму. У гэтым годзе ён праходзіць ужо пяты раз», — падкрэсліла Наталля Качанава.
Асобна спікер спынілася на развіцці агульнай інфармацыйнай прасторы. «Моцны саюз мае патрэбу ў агульнай прасторы сэнсаў, даверу, праўды. Мы павінны самі расказваць аб нашых дасягненнях, нашых людзях, нашых праектах і нашай будучыні. З красавіка гэтага года працуе медыякампанія Саюзнай дзяржавы. Гэта рашэнне прадыктавана часам. Саюзная дзяржава — гэта мільёны жывых сувязей паміж людзьмі. Інфармацыйная прастора — таксама тэрыторыя нашага суверэнітэту. І тут нельга ўступаць. Мы самі павінны фарміраваць вобраз нашага саюза», — рэзюмавала старшыня Савета Рэспублікі.
Фота Андрэя Сіняўскага, Віталя Піваварчыка
