Удзельнікі «Поезда Памяці» змогуць пазнаёміцца з нескажонай, сапраўднай гісторыяй — Качанава
Навіны сюжэта «Маладзёжная палітыка Беларусі » Больш за 600 чалавек зарэгістраваліся для ўдзелу ў ЦЭ і ЦТ у рэзервовыя дні Школы і гімназіі Беларусі пачынаюць прыём дзяцей у першыя класы 21 чэрвеня, Брэст . Удзельнікі праекта «Поезд Памяці» змогуць пазнаёміцца з нескажонай, сапраўднай гісторыяй. Такой думкай з удзельнікамі дыялогавай пляцоўкі падзялілася старшыня Савета Рэспублікі Наталля Качанава,
«Вы зможаце пазнаёміцца з нескажонай, сапраўднай гісторыяй, таму што яна не павінна паўтарыцца. Мы не маем права здрадзіць памяці старэйшых пакаленняў, таму абавязаны зрабіць усё, каб вы жылі шчасліва і, самае галоўнае, разумелі: няма нічога больш каштоўнага, чым чалавечае жыццё і дружба», — сказала Наталля Качанава.
Яна дадала, што рада вітаць удзельнікаў праекта чарговы раз на брэсцкай зямлі. Падкрэсліваючы значнасць выбару пункта старту праекта «Поезд Памяці», яна адзначыла, што гэта месца дапамагае ім акунуцца ў атмасферу тых падзей, якія некалі адбываліся на нашай зямлі.
Наталля Качанава таксама звярнула ўвагу, што былыя ўдзельнікі з гонарам расказваюць аб тым, што дакрануліся да гэтага праекта. За пяць гадоў у ім прынялі ўдзел ужо 1 тыс. чалавек. «Мы ўпэўнены, што вы гэтак жа пасябруеце і будзеце падтрымліваць сувязі адзін з адным. Я ведаю, што гэта дружба захаваецца надоўга, бо сустракалася з выпускнікамі праекта «Поезд Памяці» ва Уфе і Мінску, і яны да гэтага часу падтрымліваюць сувязь», — заўважыла спікер.
Паводле яе слоў, гэта сапраўды ўнікальны, легендарны праект, у аснове якога цудоўная ідэя: гістарычную памяць аб тых, хто плячо ў плячо ішоў на абарону нашай агульнай Айчыны ў гады вайны, трэба перадаваць з пакалення ў пакаленне.
Наталля Качанава звярнула ўвагу, што заўтра ў Беларусі сустракаюць Дзень памяці і смутку, бо 85 гадоў таму нямецка-фашысцкія захопнікі вераломна ступілі на нашу зямлю, думаючы, што літаральна за гадзіны ўправяцца з Брэсцкай крэпасцю. «Яна трымалася амаль месяц. Людзі розных нацыянальнасцей і народнасцей абаранялі Брэскую крэпасць плячо ў плячо, робячы ўсё, каб наш народ перамог», — падкрэсліла спікер.
«Як сказаў наш Прэзідэнт, Беларусь — жывы помнік той вайне. Кожны сантыметр нашай зямлі паліты крывёй людзей, якія абаранялі нашу агульную Айчыну. У нас вялікая колькасць мемарыяльных помнікаў. Мы робім усё, каб захаваць гэту памяць, і прынялі шэраг законаў, якія не дазваляюць адрадзіць нацызм у нашай краіне. Лёс Хатыні падзялілі 629 вёсак, якія былі спалены дашэнту разам з людзьмі. Толькі за апошнія гады было ўстаноўлена яшчэ 102, што сведчыць пра мноства белых плям. Мы ганарымся тым, што зрабіла старэйшае пакаленне для нас, захаваўшы мір і свабоду, і шчаслівы, што вы перадаяце гэту эстафету, таму мы павінны шанаваць гэту памяць і рабіць усё, каб вызваліцелі нашай Айчыны не былі забыты», — сказала на заканчэнне Наталля Качанава. 
Фота Віталя Піваварчыка
