У спартыўнай скарбонцы — 19 марафонаў. Як бег дапамог 87-гадовай беларусцы паправіць здароўе і быць шчаслівай
16 ліпеня, Мінск . У свае 87 гадоў Ларыса Пятрэнка з Маладзечна штодзённа бегае па 4-6 кіламетраў. Яна паўдзельнічала ў 19 марафонах, прычым у першым з іх — у 50 гадоў. У яе тры вышэйшыя адукацыі — апошні дыплом атрымала ў 71 год. А ў 78 гадоў стала ўладальніцай вадзіцельскіх правоў. Даведаліся ў маладзечанкі, як бег дапамагае здароўю і шчасліваму жыццю.
Ларысе Фёдараўне 1 чэрвеня споўнілася 87 гадоў па пашпарце, але выглядае яна значна маладзей. У паліклініку ходзіць толькі для таго, каб атрымаць даведку пры ўладкаванні на работу, на прастуду ўжо і не памятае, калі хварэла. «Калі ў мяне пытаюцца пра ўзрост, я адказваю: мне 18. Проста перастаўце лічбы і дадайце 6», — дзеліцца сваім каронным жартам субяседніца.
Амаль 15 гадоў яна працавала настаўнікам матэматыкі ў сярэдняй школе нумар 4 Маладзечна. «Любая праца, якую робіш з задавальненнем, сама па сабе ўзнагарода», — прызнаецца жанчына.
Аднак нагрузка аказалася непасільнай: па 12 гадзін у суткі без адпачынку, стрэс… У выніку арганізм не вытрымаў, і Ларыса Пятрэнка трапіла ў бальніцу, ёй далі інваліднасць III групы. Наперадзе чакалі новыя выпрабаванні, якія расцягнуліся на цэлых 15 гадоў. Усё змянілася ў адно імгненне — пасля фразы, якая нібы запусціла ланцуговую рэакцыю і дала нашай гераіні новы імпульс да жыцця.
Аднойчы сын хацеў паглядзець футбол, а яна — фільм. Сын так настойліва ўгаворваў, што Ларыса Фёдараўна ўступіла. І незадаволеная, «злосная, як мегера», стала глядзець матч. А ў перапынку паміж таймамі вядучы агучыў старадаўняе грэчаскае выслоўе: «Калі хочаш быць здаровым — бегай, калі хочаш быць разумным — бегай, калі хочаш быць прыгожым — бегай». Яна сур’ёзна ўспрыняла гэтыя словы!
Ужо на наступны дзень выйшла на стадыён і пратрухала першыя 150 м. Адчуванні былі такімі, што хацелася проста ўпасці і больш не рухацца. Але яна не ўпала і не здалася. Кожны дзень пакрыху павялічвала дыстанцыю. Праз тры месяцы ўжо бегала па кіламетры. А праз сем гадоў прабегла свой першы марафон, ёй тады было 50!
У спартыўнай скарбонцы Ларысы Пятрэнка — 19 марафонаў. У 56 гадоў яна заваявала званне чэмпіёнкі краіны сярод ветэранаў. Апошні марафон прабегла ў 2000-м, але пасля ўдзельнічала ў іншых стартах.
Кожную раніцу яе можна ўбачыць на школьным стадыёне непадалёку ад дома. Цяпер яе стандартная дыстанцыя — 4-6 км. Побач з гаспадыняй бяжыць яе сабачка Сарбона. На стадыён Ларыса Фёдараўна выходзіць у спартыўным уборы, ва ўсім белым: майка, шорты, красоўкі.
«Пры бегу атрымліваецца фаза палёту, калі абедзве нагі знаходзяцца ў паветры. Ад удару аб зямлю пяткай у нашым арганізме ўзнікае хваля, якая праштурхоўвае кроў ад ступняў да галавы, насычаючы энергіяй кожную з клетак», — тлумачыць яна.
Калі мы пацікавіліся аб мары, Ларыса Пятрэнка адказала без роздумаў: «Я прачытала, што да 2090-х вучоныя адкрыюць ген неўміручасці. Вось і мару дажыць да гэтага. Жартую, вядома. Цяпер мяне зусім не хвалююць мары, я нават не задумваюся пра іх. Пражыла дзень — і шчаслівая. Самае галоўнае, што я зразумела: мы жывём толькі тут і цяпер».
Ларыса Пятрэнка — гераіня нашага праекта «Беларусы ў кадры». Даведаліся ў яе аб захапленні бегам і яго карысці, а таксама аб удзеле ў 19 марафонах.
*Праект створаны за кошт сродкаў мэтавага збору на вытворчасць нацыянальнага кантэнту.
