У Францыі з-за моцнай спёкі значна вырасла смяротнасць — AFP
АР 28 чэрвеня, Мінск /Кар. БЕЛТА/. Нацыянальнае агенцтва па ахове здароўя Францыі (SPF) з 24 па 28 чэрвеня зафіксавала на 1 тыс. смяротных зыходаў больш, чым за аналагічныя папярэднія часавыя перыяды. Рост смяротнасці звязваюць з анамальнай гарачынёй, такую інфармацыю Agence France-Presse (AFP) прыводзіць ТАСС.
Большасць памерлых — людзі старэйшыя за 65 гадоў. Найбольшы рост смяротных зыходаў назіраецца ў парыжскім рэгіёне Іль-дэ-Франс. Тут зарэгістравана каля 40 працэнтаў ад агульнай колькасці смерцяў.
Анамальная спёка прадаўжаецца ў Францыі з 17 чэрвеня. Прыпынена работа або зменены расклад амаль 10 тыс. навучальных устаноў, абмежаваны рух чыгуначнага транспарту.
Паводле даных газеты Ouest-France, 24 і 25 чэрвеня сталі самымі спякотнымі днямі ў гісторыі метэаназіранняў у Францыі. Больш як у 50 дэпартаментах, паводле даных нацыянальнай метэаслужбы, быў дасягнуты паказчык 40 градусаў, пры гэтым у чацвер, 25 чэрвеня, найвышэйшы — чырвоны — узровень небяспекі з-за надвор’я быў аб’яўлены ў 72 з 96 дэпартаментаў.
Рэкордная спёка адзначаецца і ў Германіі. І жыхары ФРГ масава пераходзяць на начны лад жыцця, паведамляе газета Bild. Так, 27 чэрвеня папулярныя мясціны многіх нямецкіх гарадоў выглядалі бязлюднымі. Толькі ўвечары, калі тэмпература зніжалася, жыццё ў гарадах зноў ажывала. Напрыклад, у Мюнхене днём многія плошчы здаваліся практычна пустымі, а ўвечары кафэ запаўняліся ўсё больш. У раёне гадзіны ночы ў парках і піўных кафэ па-ранейшаму сядзелі дзясяткі людзей.-0-
