Васілёк усіх колераў вясёлкі і новае гучанне нот. Як Віцебск сустракаў юбілейны «Славянскі базар» у 2011 годзе
Фота з архіва 30 чэрвеня, Мінск . Да XXXV Міжнароднага фестывалю мастацтваў «Славянскі базар у Віцебску» засталося 16 дзён. БЕЛТА прапануе акунуцца ў рэтраспектыву: штодзённа ў архіўных матэрыялах расказваем аб самых яркіх момантах кожнага мерапрыемства па гадах. Сёння — аб юбілейным фестывалі 2011 года.
ХХ Міжнародны фестываль мастацтваў праходзіў з 6 па 16 ліпеня. На форум былі акрэдытаваны амаль 6 тыс. удзельнікаў і гасцей з 27 краін. За два дні да афіцыйнага адкрыцця, якое адбылося 8 ліпеня, на сцэне выступілі Дзідзье Маруані і французская група Space, таксама прыехала Патрысія Каас. У час перапынкаў паміж песнямі Дзідзье Маруані адзначыў, што рэгулярна гастралюе па постсавецкіх краінах, але ў Віцебску аказаўся ўпершыню. 
У гонар 20-годдзя арганізатары вырашылі выйсці за рамкі прывычных стандартаў і распрацавалі новы лагатып: васілёк цяпер заззяў усімі колерамі вясёлкі. Такое рашэнне адлюстроўвала шматфункцыянальнасць і яркі настрой фестывалю. Змяненні закранулі і «кветкавую ноту» на лагатыпе фестывалю: калі раней яе сцяжок размяшчаўся справа ад штыля (і нота была восьмай), то цяпер ён знаходзіцца злева, што прывяло да стварэння новай працягласці нот.
Акрамя таго, «Славянскі базар у Віцебску» стаў пераможцам у прафесійным конкурсе «Брэнд года — 2011» у катэгорыі «Культура і мастацтва». Журы ацэньвала брэнд-пакеты ўдзельнікаў па міжнародных стандартах у галіне маркетынгу і брэндынгу, а таксама ўлічвала аўтарскі падыход да стварэння прэзентацыйнага праекта. 
Напярэдадні юбілейнага фестывалю за заслугі перад горадам званне «Ганаровы грамадзянін Віцебска» было прысвоена дырэктару і заснавальніку фестывалю Радыёну Басу. Таксама на Алеі лаўрэатаў з’явілася новая зорка ўладальніка спецыяльнай узнагароды Прэзідэнта Беларусі «Праз мастацтва — да міру і ўзаемаразумення», народнага артыста СССР і Беларусі, кампазітара Ігара Лучанка. 
Міжнародны конкурс маладых выканаўцаў эстраднай песні «Віцебск-2011» праходзіў 11 і 12 ліпеня на галоўнай фестывальнай пляцоўцы — Летнім амфітэатры. Гран-пры конкурсу заваявала беларуска Алёна Ланская. Пасля рэканструкцыі адкрылася канцэртная зала «Віцебск», у якой прайшоў IX Міжнародны дзіцячы музычны конкурс. Тут спаборнічалі 23 юныя выканаўцы з 20 краін (Беларусь, Расія і Украіна дэлегавалі па два ўдзельнікі). Галоўны прыз быў уручаны спявачцы з Румыніі.
З аншлагам і ў па-сапраўднаму беларускай атмасферы прайшоў канцэртны вечар, прысвечаны Дню Саюзнай дзяржавы. Украінскія госці прадставілі яркую праграму майстроў мастацтваў «Украінскі сувенір». А ў рамках канцэрта дзеячаў мастацтваў Расіі адбыўся юбілей Дзяржаўнага акадэмічнага рускага народнага хору імя Мітрафана Пятніцкага, які на сцэне фестывалю адзначыў сваі 100 гадоў. Не засталася без увагі і разнастайная праграма «Тэатральных сустрэч». 
У 2011 годзе фестываль «Славянскі базар у Віцебску» здзівіў гледачоў мноствам новаўвядзенняў і творчых ініцыятыў. Прайшоў першы міжнародны фестываль «Агонь танца». Акрамя гэтага, маладыя мастакі ўпершыню прынялі ўдзел у Рэспубліканскім конкурсе бодзі-арту, а на пляцоўцы «Графіці» беларускія райтары аб’ядналіся для стварэння адзінага палатна на тэму «Дзень моладзі на «Славянскім базары ў Віцебску». Упершыню на выставах работ дамоў рамёстваў і народных майстроў былі прадстаўлены кулінарныя вырабы клубаў нацыянальных кухань. 
Таксама на юбілейным фестывалі 2011 года артыстам, дзеячам фестывальнага руху, журналістам, работнікам дырэкцыі было ўручана 100 эксклюзіўных юбілейных медалёў. Завяршыўся 20-ы «Славянскі базар у Віцебску» канцэртам зорак «Шансон-ТБ». 
Асноўныя мерапрыемствы XXXV Міжнароднага фестывалю мастацтваў «Славянскі базар у Віцебску» пройдуць з 16 па 19 ліпеня, а першыя канцэрты адбудуцца 14 ліпеня.
