Смелы эксперымент і прастора інтанацый. Харавая капэла імя Р.Шырмы прадставіць прэм’ерную праграму
Фота philharmonic.by 19 кастрычніка, Мінск . Заслужаны калектыў Беларусі Дзяржаўная акадэмічная харавая капэла імя Р.Шырмы 21 кастрычніка прадставіць прэм’ерную праграму «Новая прастора» ў Вялікай зале Белдзяржфілармоніі. Аб гэтым БЕЛТА паведамілі ва ўстанове культуры.
Можна будзе больш даведацца пра творчыя пошукі кампазітараў Расіі, Беларусі і замежжа, праграма даследуе трансфармацыю харавога жанру ў новым тысячагоддзі. Акадэмічная традыцыя сустрэнецца з авангарднымі тэхнікамі, мінімалізмам і элементамі неафальклору, ствараючы ўнікальнае гукавое поле — прастору сэнсаў і інтанацый.
Сярод асноўных акцэнтаў праграмы: самабытнае спалучэнне беларускага нацыянальнага каларыту з сучаснымі еўрапейскімі тэндэнцыямі, духоўная пераемнасць і пошук новай экспрэсіўнай мовы рускай харавой школы і замежныя партытуры (знаёмства з актуальнымі імёнамі заходняй харавой сцэны, якія працуюць з новымі фактурамі і прасторавымі эфектамі).
Як адзначылі ў Белдзяржфілармоніі, новая праграма — смелы эксперымент, які ахоплівае прастору сучаснай харавой музыкі і адкрывае актуальны гук.
