«Славянскі базар — 2024: культура краін ШАС, Kavkaz Music Fest, джаз на аргане
13 ліпеня, Віцебск . Да XXXV Міжнароднага фестывалю мастацтваў «Славянскі базар у Віцебску» засталося 3 дні. БЕЛТА прапануе акунуцца ў рэтраспектыву: штодзённа ў архіўных матэрыялах расказваем пра самыя яркія моманты кожнага фестывалю па гадах. Сёння — пра фестываль 2024 года.
XXXIII Міжнародны фестываль мастацтваў «Славянскі базар у Віцебску» прайшоў з 9 па 15 ліпеня. Акрэдытацыю атрымалі больш за 7 тыс. чалавек з 42 краін. Упершыню да форуму далучыліся прадстаўнікі Паўднёва-Афрыканскай Рэспублікі. Асноўнымі тэмамі фестывалю сталі 80-годдзе вызвалення Беларусі ад нямецка-фашысцкіх захопнікаў, Год якасці, 110-годдзе ўраджэнца горада Віцебска кампазітара Марка Фрадкіна, 50-годдзе заслужанага калектыву Беларусі ансамбля «Сябры». Мерапрыемствы прайшлі больш як на 20 гарадскіх пляцоўках.
Старт ім даў новы праект «Госці з будучыні», у якім прынялі ўдзел папулярныя блогеры, маладзёжныя выканаўцы і лепшыя дзіцячыя творчыя калектывы. У рамках канцэрта таксама адбыліся жараб’ёўка XXII Міжнароднага дзіцячага музычнага конкурсу «Віцебск» і цырымонія ўзнагароджання лаўрэатаў VI Міжнароднага танцавальнага праекта Dream Dance Fest.
На гала-канцэрце ўрачыстага адкрыцця гледачоў вітаў Прэзідэнт Беларусі Аляксандр Лукашэнка. «Сёння гэты фестываль аб’ядноўвае людзей розных пакаленняў, рэлігій і культур — сапраўдных знатакоў мастацтва з самымі рознымі перавагамі — ад авангарда да класікі. Але галоўнае — ён стаў сапраўды сямейным святам, святам традыцыйных каштоўнасцей. Тут жыхары і нашы госці сапраўды могуць адпачыць душой», — сказаў кіраўнік дзяржавы.
Прэзідэнт Беларусі асабліва адзначыў прысутнасць на форуме калектываў з краін Шанхайскай арганізацыі супрацоўніцтва. У праграме фестывалю быў Дзень нацыянальных культур краін ШАС. «Няхай ён стане сімвалічным пачаткам нашага сумеснага шляху да агульных мэт. Мэт, што з’ядналі больш за палову насельніцтва планеты — людзей, якім блізкая і зразумелая філасофія нашага фестывалю. У ёй ключ да міру і ўзаемаразумення, які нам даюць людзі мастацтва, таленавітыя людзі», — сказаў беларускі лідар.
На гала-канцэрце ён уручыў народнаму артысту Расіі Рыгору Лепсу галоўную прэмію фестывалю — спецыяльную ўзнагароду Прэзідэнта Беларусі «Праз мастацтва — да міру і ўзаемаразумення».
У час Дзён Саюзнай дзяржавы на форуме адбыўся канцэрт, прэм’ера мюзікла «Казка пра цара Салтана» на музыку Аляксандра Зацэпіна, упершыню ажыццёўлены Міжнародны сацыяльны духоўна-асветны праект «Кіналекторый «Інтэрнат» — пасля дакументальных кінапаказаў гледачоў чакаў дыялог з вядомымі рэжысёрамі і акцёрамі.
Прэм’ерай на «Славянскім базары» ў 2024 годзе стаў фестываль у рамках фестывалю Kavkaz Music Fest — этнічны форум родам з Нальчыка. На сцэну Віцебска выйшлі самыя папулярныя артысты каўказскай эстрады з Адыгеі, Дагестана, Кабардзіна-Балкарыі, Карачаева-Чэркесіі, Паўночнай Асеціі, Чачні. У выніку ў «Славянскага базару» з’явіўся пабрацім. Моцнае творчае сяброўства было змацавана пячаткамі і подпісамі паміж прадстаўнікамі двух фестываляў.
Галоўная падзея віцебскага форуму — Міжнародны конкурс выканаўцаў эстраднай песні «Віцебск». У першы конкурсны дзень артысты выканалі славянскі хіт у суправаджэнні Прэзідэнцкага аркестра Рэспублікі Беларусь, галоўны дырыжор — Віталь Кульбакоў. У другі дзень конкурсу, які таксама стаў днём урачыстага закрыцця форуму, прагучалі сусветныя хіты. Гран-пры было аддадзена артыстцы з Малдовы.
XXII Міжнародны дзіцячы музычны конкурс «Віцебск» прайшоў на працягу двух дзён: спачатку ўдзельнікі выступілі з творам, які найбольш ярка раскрывае выканальніцкае майстэрства і артыстычныя здольнасці вакалістаў, у суправаджэнні заслужанага калектыву Рэспублікі Беларусь Нацыянальнага акадэмічнага аркестра сімфанічнай і эстраднай музыкі імя М.Я.Фінберга, потым — з песняй на мове краіны, якую яны прадстаўлялі. Пераможцай стала юная выканаўца з Узбекістана.
Канцэртную праграму на фестывалі прадставіла арт-група «Хор Турэцкага». Народны артыст Расіі Алег Газманаў выступіў з юбілейным канцэртам «55 гадоў на сцэне». Любімыя многімі песні з яго рэпертуару розных гадоў, а таксама прэм’еры прагучалі ў жывым выкананні артыста і групы «Эскадрон» у канцэртнай зале «Віцебск».
На форуме жыхары і госці горада таксама змаглі наведаць канцэрт «Рок-панарама», дзе выступалі артысты ў суправаджэнні сімфанічнага аркестра Белтэлерадыёкампаніі, рэтравечарынку «Залаты хіт», КВЗ-гульню, удзельнікі якой змагаліся за кубак «Славянскага базару ў Віцебску», вечарынку пад адкрытым небам «Рытмы лета», гала-канцэрт «Шансон ТБ — усе зоркі».
Упершыню на «Славянскім базары» джаз прагучаў на аргане. Канцэртная праграма пачалася з сучасных кампазіцый. Далей музыканты прадоўжылі здзіўляць гледачоў не толькі вядомымі творамі, але і сваёй аўтарскай музыкай.
У нацыянальным акадэмічным драматычным тэатры імя Якуба Коласа прайшлі «Тэатральныя сустрэчы», дзе паказалі прэм’еру — «Гамлет» на беларускай мове, якая стала вынікам работы «Тэатральнай лабараторыі» папярэдняга года.
Фестывальным новаўвядзеннем у 2024 годзе сталі пашыраныя адукацыйныя праекты «Оперная лабараторыя» (сумесна з Расійскім інстытутам тэатральнага мастацтва), «Інструментальная лабараторыя» (сумесна з Расійскай акадэміяй музыкі імя Гнесіных).
На васьмі фестывальных пляцоўках адкрыліся 12 экспазіцый, сярод іх — выстаўка «Уладзімір Мулявін. Спадчына вялікага маэстра», мабільная экспазіцыя «Наш абавязак — Памятаць!», прысвечаная 80-й гадавіне вызвалення Беларусі ад нямецка-фашысцкіх захопнікаў, выстаўка «Ленінградцы. Маляўнічы партрэт са збору Дзяржаўнага музея гісторыі Санкт-Пецярбурга і інш.
Святочную атмасферу ў горадзе стварылі вулічныя перформансы, выстаўкі і спектаклі — неад’емная частка фэсту «На сямі вятрах».
Асноўныя мерапрыемствы XXXV Міжнароднага фестывалю мастацтваў «Славянскі базар у Віцебску» пройдуць з 16 па 19 ліпеня, а першыя канцэрты адбудуцца ўжо 14 ліпеня.
