Сем беларусаў у шасці відах спорту выступяць на юнацкай Алімпіядзе ў Сенегале
Фота НАК Беларусі 29 верасня, Мінск . Стаў вядомы склад беларускай дэлегацыі на IV летнія юнацкія Алімпійскія гульні, якія пройдуць у сталіцы Сенегала Дакары, паведамілі БЕЛТА ў прэс-службе НАК.
На аснове прапаноў ад нацыянальных федэрацый НАК выказаў гатоўнасць заявіць спартсменаў у 15 відах спорту. Аднак значная частка квот была накіравана Міжнародным алімпійскім камітэтам на развіццё і папулярызацыю спорту ў Афрыцы, таму для беларускай дэлегацыі было выдзелена сем месцаў у шасці дысцыплінах.
Нашу краіну ў сталіцы Сенегала прадставяць Георгій Салавей (брэйк-данс), Аляксандра Князева (дзюдо), Паліна Бяляўская, Максім Машлякевіч (абодва — плаванне), Глеб Акуневіч (стральба з лука), Дзяніс Маслаў (фехтаванне) і Багдан Аліеў (тхэквандо). Шэфам місіі назначаны начальнік міжнароднага аддзела НАК Васіль Юрчык.
IV летнія юнацкія Алімпійскія гульні пройдуць з 31 кастрычніка па 13 лістапада 2026 года. Удзел у спаборніцтвах прымуць каля 2700 спартсменаў з 207 краін, якія разыграюць медалі ў 25 відах спорту. Беларуская каманда выступіць у Дакары з нацыянальнай сімволікай.
