Прамкааперацыя, тэхніка і турызм. Галоўчанка аб сферах узаемадзеяння Беларусі і Башкортастана
26 кастрычніка, Уфа . Прамысловая кааперацыя застаецца прыярытэтнай у супрацоўніцтве Беларусі і Башкортастана. Такой думкай падзяліўся старшыня праўлення Нацыянальнага банка Раман Галоўчанка ў час пасяджэння рабочай групы па супрацоўніцтве Башкортастана і Беларусі пры ўдзеле кіраўніка Башкортастана Радзія Хабірава,
«У прыярытэце прамысловая кааперацыя, уключаючы пастаўкі беларускай тэхнікі з прыцягненнем інструментаў фінансавай падтрымкі, — сказаў Раман Галоўчанка. — Што датычыцца нашых аграрыяў, тут нядрэнна ідзе супрацоўніцтва і па збожжаўборачнай, і кормаўборачнай тэхніцы, і па акучвальных трактарах».
Старшыня праўлення Нацбанка заўважыў, што ўрад Башкортастана ўдзяляе шмат намаганняў развіццю супрацоўніцтва паміж нашымі рэспублікамі і рэалізацыі сумесных праектаў. «Няма ніякага прасядання, ігнаравання. Усе вельмі цесна працуюць над рэалізацыяй сфармуляваных задач. Мы, у прынцыпе, акрэслілі ўсе магістральныя напрамкі, агучылі магчымыя крокі па іх далейшым развіцці», — падкрэсліў ён.
Беларусь таксама зацікаўлена ў развіцці супрацоўніцтва. Наша краіна падрыхтавала фінансавую прапанову, якая здольна падтрымаць пастаўку камунальнай тэхнікі і зрабіць яе фінансава менш нагружанай для Башкортастана ў цяперашніх умовах.
«Важны і праект па развіцці электратранспарту. Дзякуючы нашай кааперацыі паміж Мінскім аўтамабільным заводам і Уфімскім трамвайна-тралейбусным заводам башкортастанскае прадпрыемства не толькі атрымала вопыт, але і аднавіла кампетэнцыі, што дало магчымасць стварыць сумеснае прадпрыемства, якое ўжо здольна выступаць як самастойны і моцны ігрок на агульнарасійскім рынку электратранспарту», — растлумачыў Раман Галоўчанка.
Акрамя таго, ідзе работа над развіццём турыстычнай сферы. Супрацоўніцтва ў гэтай галіне доўгі час заставалася на другім плане, але сёння бакі зацікаўлены ў абмеркаванні розных пытанняў і прапаноў.
