Пастаянны прадстаўнік Беларусі пры АДКБ і намеснік сакратара Савета бяспекі РФ абмеркавалі ўзаемадзеянне ў сферы бяспекі
Фота з архіва 28 жніўня, Масква /Эдуард Півавар . У Маскве адбылася сустрэча пастаяннага і паўнамоцнага прадстаўніка Беларусі пры Арганізацыі Дагавора аб калектыўнай бяспецы Уладзіміра Бяспалага з намеснікам сакратара Савета бяспекі Расіі Аляксеем Шаўцовым. Аб гэтым БЕЛТА паведамілі ў прэс-службе пасольства Беларусі ў РФ.
Бакі абмяняліся думкамі па перспектыўным парадку дня беларуска-расійскага ўзаемадзеяння ў сферы бяспекі, а таксама сумеснай рэалізацыі прыярытэтаў расійскага старшынства ў АДКБ і падрыхтоўцы да маючых адбыцца пасяджэнняў статутных органаў арганізацыі.
«Разгледжаны пытанні далейшага развіцця двухбаковага супрацоўніцтва па лініі апаратаў саветаў бяспекі Беларусі і Расіі. Адзначана неабходнасць прадаўжэння сістэмнай работы па маніторынгу сучасных выклікаў і пагроз, а таксама практычнай рэалізацыі палажэнняў Канцэпцыі бяспекі Саюзнай дзяржавы», — сказалі ў прэс-службе.
У бліжэйшы час Мінск і Масква стануць пляцоўкамі для абмеркавання шырокага спектра пытанняў глабальнай і рэгіянальнай бяспекі. Прадстаўнічыя дэлегацыі Беларусі і Расіі прымуць удзел у IV Мінскай міжнароднай канферэнцыі па еўразійскай бяспецы і Форуме калектыўнай бяспекі ў Маскве.
