Новыя вытворчасці і пастаўкі прадукцыі. Беларусь і М’янма падпісалі пакет дакументаў аб супрацоўніцтве
20 жніўня, Мінск . Пакет дакументаў аб супрацоўніцтве падпісаны ў час Беларуска-м’яманскага бізнес-форуму ў Мінску,
У планах — стварыць прадпрыемства па вытворчасці скуранога абутку ў М’янме. Адпаведны мемарандум падпісалі СТАА «Белвест», МА ААТ «Луч» — кіруючая кампанія холдынга «Абутак — «Луч», ААТ «Мінскае вытворчае гарбарнае аб’яднанне» і м’янманская кампанія Asia Point of Potential.
Яшчэ адзін важны дакумент — ліцэнзійнае пагадненне на зборку тэхнікі МАЗ у М’янме паміж ААТ «МАЗ» — кіруючая кампанія холдынга «БЕЛАЎТАМАЗ» і кампаніяй Eastern Valley Partners Company Limited. Гэта ж кампанія заключыла мемарандум аб узаемаразуменні з ААТ «АМКАДОР» — кіруючая кампанія холдынга».
Мемарандум аб пастаўцы медыцынскага абсталявання і медвырабаў падпісаны паміж ААТ «Ольса» і кампаніяй Apex Care Co., Ltd. З гэтай жа кампаніяй заключылі мемарандумы аб узаемаразуменні РУП «Белмедпрэпараты» і РУП «Медтэхнацэнтр».
Акрамя таго, падпісаны кантракт на пастаўку трактаракамплектаў паміж ААТ «Мінскі трактарны завод» і кампаніяй Myanmar Empire. Гэта кампанія заключыла кантракт і з ААТ «Лідахлебапрадукт», пагадненне з ААТ «Слуцкі сыраробны камбінат», мемарандум аб пастаўках гідраксіламінсульфату з ААТ «Гродна Азот» і кантракт аб пастаўках поліэфірнага корду з яго філіялам «Завод Хімвалакно».
Падпісаны дакументы ў галіне адукацыі. У прыватнасці, мемарандум аб узаемаразуменні паміж БНТУ і Мандалайскім тэхналагічным універсітэтам, дагавор аб супрацоўніцтве паміж Віцебскім медыцынскім універсітэтам і 1-м Медыцынскім універсітэтам (Янгон). Таксама заключаны дагавор паміж БДУІР і Універсітэтам камп’ютарных даследаванняў (М’янма) аб рэалізацыі сумеснай праграмы па падрыхтоўцы спецыялістаў з вышэйшай адукацыяй у сферы інфармацыйна-камунікацыйных тэхналогій.
Першы намеснік міністра замежных спраў Беларусі Сяргей Лукашэвіч падкрэсліў, што бізнес-форум з’яўляецца асновай для далейшага пашырэння гандлёва-эканамічных адносін з М’янмай. «Сёння пачаўся афіцыйны візіт вялікага сябра Беларусі — Прэзідэнта М’янмы. Гэта чарговы этап нашых двухбаковых адносін. Пачынаем мы яго з бізнес-форуму. Прайшла сустрэча на ўзроўні прэм’ер-міністра. Безумоўна, эканамічны блок нашых дамоўленасцей будзе выведзены на новы ўзровень. М’янме ўдзяляецца павышаная ўвага з пункту гледжання нашых эканамічных інтарэсаў, мы ўжо рэалізуем шэраг праектаў па лініі МАЗ, МТЗ, у галіне лёгкай прамысловасці, малочнатаварных ферм», — сказаў ён.
Як адзначыў старшыня Беларускай гандлёва-прамысловай палаты Міхаіл Мятлікаў, вялікі інтарэс да наладжвання ўзаемавыгаднага супрацоўніцтва з М’янмай пацвярджае шырокі ўдзел у форуме беларускага бізнесу — кампаній, якія прадстаўляюць розныя сферы эканомікі: машынабудаванне, дрэваапрацоўка, будаўніцтва, харчовая, лёгкая і хімічная прамысловасць, фінансы, адукацыя, турызм. «Да нас прыбыла вялікая дэлегацыя з М’янмы. Прайшлі B2B-перагаворы, прэзентацыі, цырымонія падпісання раней напрацаваных кантрактаў. За апошнія два гады гэта чацвёрты форум, які мы праводзім з нашымі партнёрамі з Федэрацыі гандлёва-прамысловых палат М’янмы. Два з іх прайшлі ў Янгоне, два ў Мінску. Хачу сказаць, што нашы эканомікі не перасякаюцца, мы не канкурыруем і можам дапаўняць адзін аднаго. Думаю, што ўстаноўленыя сёння кантакты дадуць новыя вынікі ў бліжэйшы час і павысяць наш тавараабарот», — абазначыў ён. 
Фота Віталя Піваварчыка
