Міністры замежных спраў узгаднілі праект заявы кіраўнікоў дзяржаў у сувязі з 35-годдзем СНД
7 кастрычніка, Аваза . Міністры замежных спраў у Туркменістане на пасяджэнні Савета міністраў замежных спраў краін СНД узгаднілі праект заявы кіраўнікоў дзяржаў у сувязі з 35-годдзем Садружнасці. Аб гэтым па выніках пасяджэння заявіў генеральны сакратар СНД Сяргей Лебедзеў,
Паводле слоў генеральнага сакратара, на пасяджэнні міністры асноўны час удзялілі абмеркаванню актуальных пытанняў міжнароднага парадку дня і ўзаемадзеяння ў рамках Садружнасці. Прынята рашэнне аб правядзенні чарговага пасяджэння Савета міністраў замежных спраў у красавіку 2027 года ў Бішкеку.
У Выканкаме СНД з падзяліліся і іншымі вынікамі пасяджэння. 
Члены СМЗС прынялі праект плана мерапрыемстваў на 2027-2028 гады па рэалізацыі Стратэгіі развіцця супрацоўніцтва дзяржаў — удзельніц СНД у галіне турызму на 2021-2030 гады. Дакумент складаецца з сямі раздзелаў і прадугледжвае мерапрыемствы па ўдасканаленні прававога рэгулявання, статыстычнага ўліку, стандартаў якасці прадастаўлення турыстычных паслуг, развіцці сістэмы бяспекі турыстаў і турыстычных прадпрыемстваў.
Акрамя таго, план прадугледжвае развіццё месцаў размяшчэння і адпаведнай інфраструктуры турызму, навуковае забеспячэнне і ўдасканаленне сістэмы адукацыі і павышэння кваліфікацыі кадраў. Асобны блок мер прысвечаны падтрымцы дзіцячага, маладзёжнага і сацыяльнага турызму, пашырэнню сеткі міжрэгіянальных маршрутаў, прасоўванню турыстычных прадуктаў і павышэнню эфектыўнасці інфармацыйнага суправаджэння галіны.
СМЗС зацвердзіў план шматузроўневых кансультацый паміж міністэрствамі замежных спраў у рамках СНД на 2027 год. У дакумент традыцыйна ўключаны тэмы каардынацыі пазіцый дзяржаў Садружнасці ў ААН і ўзаемадзеяння з іншымі міжнароднымі арганізацыямі. Прадугледжваецца правядзенне кансультацый, якія датычацца знешнепалітычнага планавання, процідзеяння новым выклікам і пагрозам, кантролю над узбраеннямі і раззбраенчай тэматыкі, узаемадзеяння ў інфармацыйнай сферы, а таксама па актуальных пытаннях шматбаковай эканамічнай дыпламатыі.
На пасяджэнні таксама быў прыняты план мерапрыемстваў на 2027-2028 гады па рэалізацыі Стратэгіі міжнароднага маладзёжнага супрацоўніцтва дзяржаў — удзельніц Садружнасці на 2021-2030 гады. Ён складаецца з дзевяці раздзелаў і накіраваны на каардынацыю намаганняў дзяржаўных органаў, маладзёжных грамадскіх арганізацый і органаў галіновага супрацоўніцтва СНД у стварэнні спрыяльных умоў для міжнароднага маладзёжнага ўзаемадзеяння. 
План уключае ў сябе мерапрыемствы, праекты і праграмы міжнароднага характару, якія прадугледжваюць удзел маладзёжных дэлегацый з іншых дзяржаў. У ім таксама адлюстраваны ўдзел моладзі краін Садружнасці ў значных міжнародных падзеях за межамі СНД, такіх як злёт Сусветнага фестывалю моладзі і Міжнародны інжынерны чэмпіянат CASE-IN — Студэнцкая ліга.
Члены СМЗС падпісалі план мерапрыемстваў на 2027-2028 гады па рэалізацыі Стратэгіі развіцця супрацоўніцтва дзяржаў — удзельніц СНД у галіне фізічнай культуры і спорту на 2021-2030 гады. Дакумент аб’ядноўвае доўгатэрміновыя праграмы і канкрэтныя мерапрыемствы ў сямі тэматычных раздзелах. План прадугледжвае комплексную падтрымку: ад падрыхтоўкі нацыянальных алімпійскіх, паралімпійскіх і дэфлімпійскіх зборных да развіцця масавага, школьнага і студэнцкага спорту. Асаблівая ўвага ў дакуменце ўдзелена абнаўленню спартыўнай інфраструктуры, барацьбе з допінгам, падрыхтоўцы кадраў і лічбавізацыі галіны. Асобны блок прысвечаны стварэнню станоўчага іміджу фізічнай культуры праз сродкі масавай інфармацыі і ўзмацненню ролі спорту для фарміравання ў грамадзян здаровага ладу жыцця.
На сустрэчы былі прыняты рашэнні аб стварэнні шэрага базавых арганізацый. Напрыклад, статус базавай арганізацыі па даследаванні праблем барацьбы з трансгранічнай злачыннасцю, навучанні кадраў і павышэнні кваліфікацыі профільных спецыялістаў пагранічных ведамстваў атрымаў Інстытут пагранічнай службы Беларусі.
Міністры замежных спраў прынялі сумесную заяву аб падтрымцы практычных крокаў па прадухіленні гонкі ўзбраенняў у касмічнай прасторы, дзе гаворыцца, што краіны Садружнасці ажыццяўляюць дзейнасць па даследаванні і выкарыстанні касмічнай прасторы ў інтарэсах развіцця міжнароднага супрацоўніцтва і ўзаемаразумення, падтрымання міжнароднага міру і бяспекі.
Абмеркавана таксама пытанне аб Міжнародным кінафестывалі дзяржаў — удзельніц СНД «Садружнасць». Міністры адобрылі праект палажэння аб кінафестывалі. Канчатковае рашэнне па гэтым пытанні будзе прынята на пасяджэнні Савета кіраўнікоў урадаў СНД у снежні 2026 года. 
Акрамя таго, кіраўнікі знешнепалітычных ведамстваў адобрылі шэраг праектаў дакументаў, якія будуць накіраваны на разгляд вышэйшых органаў Садружнасці — Савета кіраўнікоў дзяржаў і Савета кіраўнікоў урадаў СНД. Акрамя згаданай вышэй заявы ў сувязі з 35-годдзем утварэння Садружнасці, гэта рашэнні аб супрацоўніцтве ў галіне турызму, аб’яўленні ў Садружнасці 2029 года Годам транспартнай звязанасці СНД, мерах па фарміраванні станоўчага вобраза СНД і яе дзяржаў-удзельніц у інфармацыйнай прасторы, унясенні паправак у Пагадненне аб супрацоўніцтве ў барацьбе са злачынствамі ў сферы інфармацыйных тэхналогій.
Як паведамлялася , Прэзідэнт Беларусі Аляксандр Лукашэнка 8 і 9 кастрычніка зробіць рабочы візіт у Туркменістан, дзе прыме ўдзел у пасяджэнні Савета кіраўнікоў дзяржаў СНД. Лідары краін абмяркуюць узаемадзеянне ў рамках Садружнасці Незалежных Дзяржаў, якой у гэтым годзе спаўняецца 35 гадоў. Аляксандр Лукашэнка ў сваім выступленні на пасяджэнні выкажа пазіцыю беларускага боку па актуальных тэмах дзейнасці СНД, а таксама аб патэнцыяле і далейшых перспектывах гэтага міжнароднага аб’яднання.
На парадку дня пасяджэння ўвогуле больш за паўтара дзясятка пытанняў. Яны ў тым ліку датычацца сацыяльнага развіцця і якасці жыцця, транспартнай звязанасці СНД, сумеснай работы ў інфармацыйнай прасторы, супрацоўніцтва ў праваахоўнай сферы, захавання гістарычнай памяці.
