Мабільныя платформы і лічбавая геалогія: Беларусь і Расія пашыраюць экалагічнае супрацоўніцтва
Фота з архіва 28 кастрычніка, Мінск . Беларусь і Расія плануюць узмацніць супрацоўніцтва ў геалагічным карціраванні і лічбавізацыі. Аб гэтым ішла размова на сустрэчы міністра прыродных рэсурсаў і аховы навакольнага асяроддзя Беларусі Максіма Лысенкі і намесніка міністра прыродных рэсурсаў і экалогіі Расіі Максіма Каралькова, дзе бакі абмеркавалі ключавыя пытанні супрацоўніцтва. Аб гэтым паведамілі БЕЛТА ў прэс-службе Мінпрыроды.
Вядзецца актыўная работа над укараненнем праекта «Мадэрнізацыя і развіццё сістэмы маніторынгу радыяцыйнай абстаноўкі Саюзнай дзяржавы з выкарыстаннем мабільных платформ радыёметрычных вымярэнняў».
«Значным элементам нашага супрацоўнцтва з’яўляецца развіццё навуковай сферы і павышэнне кадравага патэнцыялу, у тым ліку гідраметэаралагічнай службы», — адзначыў Максім Лысенка.
Штогод Белгідрамет накіроўвае каля 10 спецыялістаў на навучанне і павышэнне кваліфікацыі па розных адукацыйных праграмах ва ўстановы Расгідрамета.
Акрамя таго, беларускі бок зацікаўлены перадавым вопытам Расіі ў арганізацыі турызму на асабліва ахоўных прыродных тэрыторыях. Увага была ўдзелена заканадаўчаму рэгуляванню гэтай сферы, каб укараніць эфектыўныя механізмы і адаптаваць лепшыя практыкі ў Беларусі.
Абмеркаваны вынікі праведзенай у верасні ў Мінску сесіі Міжурадавага савета па разведцы, выкарыстанні і ахове нетраў. У прыватнасці, адзначана неабходнасць узмацнення ўзаемадзеяння прадпрыемстваў, якія ўваходзяць у сістэму Мінпрыроды Расіі і Мінпрыроды Беларусі па пытаннях геалагічнага карціравання, лічбавізацыі геалагічнай галіны, правядзення сумесных мерапрыемстваў геалагічнай накіраванасці.
Асобна ўдзелена ўвага перадачы геалагічных матэрыялаў, якія знаходзяцца на захоўванні ў «Расгеалфондзе», атрыманых у розныя гады па выніках вывучэння тэрыторыі Беларусі.
Кіраўнікі прыродаахоўных ведамстваў таксама абмеркавалі дату і парадак дня будучага сумеснага пасяджэння калегіі Мінпрыроды Беларусі і Мінпрыроды Расіі на тэрыторыі Беларусі.





