Лукашэнка зацвердзіў навацыі па пытаннях рэспубліканскай сістэмы маніторынгу грамадскай бяспекі
Фота з архіва 28 кастрычніка, Мінск . Прэзідэнт Беларусі Аляксандр Лукашэнка 28 кастрычніка падпісаў указ №386 «Аб змяненні ўказаў Прэзідэнта Рэспублікі Беларусь па пытаннях рэспубліканскай сістэмы маніторынгу грамадскай бяспекі». Аб гэтым паведамілі ў прэс-службе беларускага лідара.
Унесены змяненні ва ўказ ад 28 лістапада 2013 года №527 «Аб пытаннях стварэння і прымянення сістэмы відэанагляду ў інтарэсах забеспячэння грамадскага парадку» ў частцы ўскладання абавязкаў на аблвыканкамы і Мінскі гарвыканкам па штогадовай актуалізацыі пералікаў аб’ектаў, якія падлягаюць абавязковаму абсталяванню сродкамі відэанагляду.
Указ ад 25 мая 2017 года №187 «Аб рэспубліканскай сістэме маніторынгу грамадскай бяспекі» выкладзены ў новай рэдакцыі з улікам практычнага вопыту прымянення гэтай сістэмы.
Прадугледжваецца дадатковае прыцягненне індывідуальных прадпрымальнікаў і юрыдычных асоб да арганізацыйнага і фінансавага забеспячэння сістэмы маніторынгу. Пры гэтым фізічныя асобы, уласнікі жылых памяшканняў у шматкватэрных жылых дамах, вызваляюцца як ад кампенсацыі расходаў рэспубліканскага бюджэту, так і ад аплаты электраэнергіі, якая спажываецца абсталяваннем рэспубліканскай сістэмы маніторынгу грамадскай бяспекі.
Вызначаюцца суб’екты, якія вызваляюцца ад кампенсацыі расходаў, звязаных з фінансаваннем работ (паслуг) па ўтрыманні і эксплуатацыі сістэмы маніторынгу (бюджэтныя арганізацыі, арганізацыі камунальнай формы ўласнасці, дзяржаўнай дарожнай гаспадаркі і іншыя). Пры гэтым спіс такіх суб’ектаў не з’яўляецца канчатковым і можа быць дапоўнены па рашэнні Прэзідэнта Беларусі.
Павялічана колькасць карыстальнікаў рэспубліканскай сістэмы маніторынгу грамадскай бяспекі. Дабаўлены падраздзяленні Узброеных Сіл, якія ажыццяўляюць аператыўна-вышуковую дзейнасць і ахову крытычна важных аб’ектаў.
Прадугледжана магчымасць выкарыстання сістэмы маніторынгу для фіксацыі адміністрацыйных правапарушэнняў супраць бяспекі руху і эксплуатацыі транспарту.
Указам унесены і шэраг іншых змяненняў, накіраваных на павышэнне тэмпаў і якасці развіцця сістэмы маніторынгу.
