Лакалізацыя вытворчасці сельгастэхнікі і вывучэнне вопыту. Дэлегацыя Брэсцкай вобласці наведае Бразілію
Фота з архіва 23 верасня, Брэст . Дэлегацыя афіцыйных і дзелавых колаў Брэсцкай вобласці ў канцы верасня — пачатку кастрычніка наведае з візітам Бразілію. Аб гэтым паведамілі ў прэс-службе Брэсцкага аблвыканкама.
Асноўная тэма — супрацоўніцтва ў сферы сельскай гаспадаркі. Раней бакі вялі перагаворы з адной з бразільскіх кампаній аб рэалізацыі сумеснага праекта па лакалізацыі вытворчасці сельгастэхнікі. У прыватнасці, брэсцкія спецыялісты наведаюць прадпрыемства, азнаёмяцца з яго вытворчымі магутнасцямі і асартыментным пералікам прадукцыі.
«З кіраўніцтвам кампаніі пройдуць перагаворы па рэалізацыі сумеснага праекта па лакалізацыі вытворчасці сельскагаспадарчай тэхнікі на тэрыторыі Брэсцкай вобласці. Дэлегацыя плануе таксама наведаць сельскагаспадарчыя арганізацыі Бразіліі, вывучыць методыкі сельгасработ па вырошчванні збожжавых культур, абмяняцца вопытам і тэхналогіямі вядзення сельскай гаспадаркі», — праінфармавалі ў прэс-службе.
У камітэце па сельскай гаспадарцы і харчаванні Брэсцкага аблвыканкама растлумачылі, што бразільская кампанія вырабляе агрэгат па ўнясенні пылападобных угнаенняў для вапнавання глебы. Такі падыход прыкладна на 20% павышае эфектыўнасць мінеральных угнаенняў, дзякуючы чаму ўзрастае ўраджайнасць культур. «У нас кіслых глеб каля 40%. Штогод павялічваем аб’ёмы вапнавання. Існуючыя машыны даюць магчымасць нам уносіць суцэльным метадам. Агрэгат бразільскай кампаніі практычна не залежыць ад скорасці ветру, дыферэнцыравана ўносіць вапнавыя матэрыялы па картах кіслотнасці і элементарных участках. Прадукцыйнасць большая і вышэйшая дакладнасць», — акцэнтавалі ўвагу ў аблсельгасхарчы.
Такі агрэгат выкарыстоўваюць у «Велікасельскім Агра» Пружанскага раёна. «Савушкін прадукт» набыў яго для трох сваіх прадпрыемстваў «Савушкіна», «Савушкіна Пушча», «Савушкін-Прамень» у Маларыцкім, Камянецкім і Бярозаўскім раёнах. Далейшы плануемы крок Брэсцкай вобласці — лакалізацыя вытворчасці. Для гэтага разглядаецца пляцоўка Жабінкаўскай сельгастэхнікі.
Спецыялісты Брэсцкай вобласці ў час візіту ў Бразілію вывучаць вопыт вырошчвання больш засухаўстойлівых сартоў і гібрыдаў кукурузы і пшаніцы. У сферы інтарэсаў і тэхналогіі нулявой або безадвальнай апрацоўкі глебы. «Пераймаем вопыт краін з гарачым кліматам. Апошнія гады ў нас таксама гарачыя ўмовы надвор’я. Будзем вывучаць, як з гэтым працуюць у Бразіліі», — рэзюмавалі ў камітэце па сельскай гаспадарцы і харчаванні Брэсцкага аблвыканкама.
